Rusiye Tahqiqat komitetiniñ Qırımnıñ Aqmescit rayonı boyunca tahqiqat bölüginde «Agora» halqara insan aqlarını qorçalav gruppasınıñ advokatı Aleksey Ladinge, ekstremizmde qabaatlanğan İsmail Ramazanovğa dair cinaiy işniñ materiallarınen resim çıqaruv yolunen tanış oluv aqqını qullanmağa imkân bermediler. Bunı advokat iyül 5-te Facebookta bildirdi.
Onıñ sözlerine köre, Rusiye uquqında buña ruhset olsa da, tahqiqatçı Dmitriy Kosâkin advokatqa, materiallarnıñ kopiyalanması yalıñız kseroks yardımınen yapıla bile, dedi.
Aleksey Ladin, tahqiqat bölüginiñ rehberi Mihail Şiçkin, «resim çıqaruv esnasında onı gizliden qayd eteceginden qorqqanı içün» tahqiqatçığa qol tuttı, dep qayd etti.
Tahqiqatçılarnıñ areketlerine suiistimal degen advokat, «baqayıq, prokuratura ve mahkeme olarnıñ noqtai-nazarına qoşulacaqmı», dep, olıp keçken adiseni izaladı.
Mevzuğa dair: Aleksey Ladin: «İsmail Ramazanovnıñ işinde milleti – qabaatnı ağırlaştırğan vaziyettir»
Aleksey Ladin, iyül 3-te Aqmescit rayon mahkemesi onı ve İsmail Ramazanovnı, işnen tanış müddeti boyunca iyül 13-ke qadar sıñırladı, aynı zamanda advokat «işniñ materialınen tanış olmağa başlamağan edi, İsmailniñ tanış oluv protokolı ise sahteleştirildi», dep hatırlattı.
Rusiye Tahqiqat komitetiniñ Qırımnıñ Aqmescit rayonı boyunca tahqiqat bölüginde advokatnıñ sözlerini izalamaylar.
İsmail Ramazanov, yanvar 23-te Rusiye telükesizlik hadimleri Novıy Mirdeki evini tintken soñ ekstremizmniñ propagandasında qabaatlanğan edi. Daa soñra mahkeme, yaqalanğannı tevqif etti.
Rusiyeniñ Qırım boyunca Tahqiqat komitetinde, internet rediosı vastasınen ekstremistik materiallarnıñ tarqatılmasında qabaatlanğan Aqmescit rayonınıñ sakinine qarşı tergevciler tarafından cinaiy iş açıldı, dep bildirildi.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
