Kreml nezareti altındaki Aqmescit rayom mahkemesi ekstremizm propagandasında qabaatlanğan İsmail Ramazanovnıñ işi boyunca taqiqatçınıñ muracaatını qısmen qanaatlendirdi ve imaye tarafınıñ iş materialınen bağlı muddetni sıñırladı. Bıu aqta Qırım.Aqiqat muhbiri haber ete.
Ramazanov ve onıñ adliyecisi Aleksey Ladin iyülniñ 13-ne qadar işnen tanışıp çıqmalı. Taqiqatçı mahkemeni Ladin işni enqastan uzatqanını ve «faktik olaraq taqiqat tedbirini uzata» dep iddia etti. Bu arada adliyeciniñ özü oturışuvlarda onıñ imayesi altındaki şahısnıñ taqiqat işleri uzatılğanı aqqında defalarca aytıp, taqiqat tezce yürmesi içün qabaatlağan taraf tenbiyelgenini rica etken edi.
«Saat 9-dan 16-ğace demek qulaqqa pek hoş kele (taqiqatçı iş künlerinde iyülniñ 4-nden 13-ne qadar tanışqanını temin etmek – QA). Tevqif etilgenlerni SİZOdan saat 10:00 ya da 10:30da çıqara ve 12:00 keri alıp kireler. Üyleden soñ saat 14:30da ya da 15:00de çıqarıp, saat 16:00de alıp kireler. Vaziyet böyle eken, Ramazanov kün devamında işni sadece üç saat devamında oqup olur (240 saifeden ibaret 2 cılt – QA). Ayrıca taqiqatçı SİZOda Ramazanovqa maddiy isbatnı kösterip olamay, albuki olarnen ille ki, tanışmaq kerekmiz», – dep añlattı Ladin.
Mevzunen bağlı olaraq: Aleksey Ladin: «Milliy mensubiyeti – İsmail Ramazanovniñ işini ağırlaştırğan unsurdır»
Bir kün evel «Agora» halqara uquimaye gruppasınıñ adliyecisi Aleksey Ladin, Aqmescit SİZOsında tutulğan vaqıt içinde Ramazanov iç bir kere olsa da taqiqat areketine celp etilmedi dep ayta.
İsmail Ramazanov, yanvarniñ 23-nde Rusiye telükesizlik hadimleri Novıy Mirdeki evini tintken soñ ekstremizm propagandasında qabaatlanğan edi. Daa soñra mahkeme, şübheli dep tanılğan şahısnı tevqif etti.
Rusiyeniñ Qırım boyunca Tahqiqat komiteti, internet rediosı vastasınen ekstremistik materiallarnıñ tarqatılmasında qabaatlanğan Aqmescit rayonınıñ sakinine qarşı taqiqatçılar tarafından cinaiy iş açılğanı bildirdi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirilmege başladı.
