Qırımtatar Milliy Meclisi reisiniñ muavini Ahtem Çiygoz, Volodımır Baluhqa qarşı yañı ükümni, Rusiye ükümetiniñ ukrain faaliyetçisinden, noqtai-nazarını açıqtan ifadelegeni içün öç almasıdır, dep saya. Bunı Çiygoz iyül 5-te Qırım.Aqiqat içün bergen izaatlarda bildirdi.
Çiygoz: «Volodımır bunıñ (Ukrainağa qol tutqan noqtai-nazarınıñ – QA) koloniya ile bitecegini evelden, tecribeden bilse de, küreşini toqtatmadı. O, bir çoq adamlar kibi «sağğa-solğa atılmağa» başlamadı. O, Vatanına, devletine, milletine sadaqatını açıqtan, aşkâr şekilde ifade ete edi. Bu ise Qırımdaki işğalci ükümetniñ saruvını küydire, nefretini doğura. Qırımda kütlelerge, insanlarnıñ şuurına tesir etken böyle bir qarşılıq kösterüv şekliniñ bastırılmasına bütün quvetini doğrultqan da tamam FSBdir», – dedi.
Onıñ aytqanına köre, Rusiye ükümeti içün koloniya-qasaba şeklindeki birnici üküm «azlıq etti».
«Birinci davanıñ azlıq etkeni añlaşıla edi. Oña yalıñız koloniya-qasaba berildi. İşke FSB qarıştı. Onı, açıqtan ifadelegen noqtai-nazarı ve endi apishanede bulunğan vaqıtta faal aşkârlığı içün bu yañı qabaatlav ile kerçek bir apis etilmesine ketirecekleri belli oldı», – dep ilâve etti o.
İyül 5-te Kremlniñ kontroli altında olğan Aqşeyh (Razdolnoye) rayon mahkemesi ukrain faaliyetçisi Volodımır Baluhnı eki cinaiy işniñ birleştirilmesi boyunca 5 yılğa umumiy rejimli koloniyağa ve 10 biñ ruble (qararnen 4 biñ hrivna) cöremege mahküm etti.
Faaliyetçige qarşı ekinci cinaiy iş, Aqşeyh (Razdolnoye) qasabasındaki muvaqqat tutuluv izolâtorınıñ rehberi Valeriy Tkaçenkonıñ arizası esasında açıldı. O, Baluh onı kötekledi, dep iddia ete. Aynı zamanda faaliyetçi ve onıñ imayesi, Tkaçenko özü oña ucüm etti, dep bildireler.
Daa evel mahkeme ukrain faaliyetçisine tevqif etilüv şeklinde sıñırlav tedbirini ağustos 14-ke qadar uzattı.
Baluh, mart 19-da ilân etken muddetsiz açlıqnı tutmağa devam ete.
Rusiye FSBsi Volodımır Baluhnı 2016 senesi dekabr 8-de yaqaladı. FSB hadimleri Volodımır Baluh yaşağan evniñ tavanında 90 patron ile bir qaç trotil şaşkasını taptılar, dep iddia ete ediler. Qırımda mahkeme Baluhnı, arbiy yedekler saqlağanında qabaatlı tanıp, 3 yıl ve 5 ayğa koloniya-qasabada azatlıqtan marum etilmesi ve, ondan ğayrı, 10 000 ruble (qararnen 4600 hrivna) miqdarında cöreme tölemesine dair üküm çıqardı.
Mevzuğa dair: Volodımır Baluh: «vatanğa sevgi içün er angi fiyatnı tölemege azırım»
Baluhnıñ imayesi ve aq-uquq qorçalayıcıları, onıñ Ukraina vatanperveri olğanı sebebinden – eviniñ azbarında Ukraina bayrağı olğanı içün repressiyalar qurbanı olğanını iddia eteler.
Ukraina TİNi ve AQŞ ukrain faaliyetçisi Volodımır Baluhnıñ Rusiye ükümeti tarafından azat etilmesinde israr eteler.
