Link açıqlığı

Saatnıñ esas haberi

Rusiye prezidentiniñ matbuat kâtibi Dmitriy Peskov, Rusiye prezidenti Vladimir Putin AQŞ prezidenti Donald Tramp ile Qırım meselesini müzakere etmek niyetinde olmağanını bildirdi.

İyül 2-de keçken matbuat konferentsiyasında Peskov: «Rusiye prezidenti, kün tertibinde Qırım kibi meselesiniñ olması mümkün degil ve olmaycaq, çünki Qırım Rusiyeniñ ayırılmaz qısmı ola, dep defalarca beyan etti ve subetdeşlerine añlattı. Bütün diger meseleler – konsensus meseleleri, müzakereler ve ihtimallı uzlaşuv noqtalarını qıdırma meseleleridir», – dedi. Bunı «İnterfaks-Rossiya» bildire.

Bunıñ arfesinde Tramp jurnalistlerge, iyülde keçecek Rusiye prezidenti Vladimir Putinnen müzakerelerinde ilhaq etilgen Qırım meselesini müzakere ete bilecegini bildirdi.

Daa soñra Beyaz evniñ milliy telükesizlik boyunca mesleatçısı Con Bolton CBS telekanalınıñ yayınında, Donald Trampnıñ, Qırımnıñ Rusiye tarafından ilhaq etilmesini ihtimal ile tanuv aqqında sözleri, Qoşma Ştatlarnıñ noqtai-nazarı degil, dep bildiri.

Bolton Rusiye prezidenti Vladimir Putin ile Moskvada iyün 27-de körüşti. Körüşüvden soñ o, subet esnasında, 2016 senesinde AQŞ prezidenti saylavına qarışuvnı köz ögüne alaraq, kelecekteki AQŞ Kongressine saylavları münasebeti ile Moskvanıñ areketleri aqqında meselege toqunğanını ikâye etti.

Boltonnıñ aytqanına köre, Putin: «2016 senesinde Rusiye devleti tarafından iç bir qarışuv olmadı», dep iddia etti.

AQŞ ve Rusiye prezidentleri iyül 16-da Helsinkide birinci kere körüşecekler.

Donald Tramp ile Vladimir Putin halqara körüşüvlerniñ kuluarlarında eki kere körüşti ve eñ azından sekiz kere telefon ile laqırdı ettiler. 2014 senesinde Qırımnıñ ilhaqından soñ Rusiye ve AQŞ prezidentleriniñ resmiy körüşüvi olmadı.

XS
SM
MD
LG