Link açıqlığı

Saatnıñ esas haberi

Con Bolton: Trampnıñ Qırım aqqında sözleri AQŞnıñ noqtai-nazarı degil


Beyaz evniñ milliy telükesizlik boyunca mesleatçısı Con Bolton Moskvadaki matbuat konferentsiyasında, 2018 senesi iyün 27 künü
Beyaz evniñ milliy telükesizlik boyunca mesleatçısı Con Bolton Moskvadaki matbuat konferentsiyasında, 2018 senesi iyün 27 künü

Beyaz evniñ milliy telükesizlik boyunca mesleatçısı Con Bolton, iyül 1-de CBS telekanalınıñ yayınında, Donald Trampnıñ, Qırımnıñ Rusiye tarafından ilhaq etilmesini ihtimal ile tanuv aqqında sözleri, Qoşma Ştatlarnıñ noqtai-nazarı olmağanını bildiri.

«Amerikanıñ sesi»: «Muhbir, Qırımnı Rusiyeniñ bir qısmı olaraq tanımaq imkânını qatiyen red etmegen Trampnıñ sözlerini nasıl qabul etmeli, dep sorağanda Con Bolton: «Men onıñ asılında bunı aytqanını bilmeyim… Fikrimce, prezident, ecnebiy liderler ile keniş meseleler dairesi boyunca müzakereler etmege ve olarnıñ noqtai-nazarınlarını eşitmege azır olğanını köstermek içün sıq-sıq «baqarmız» dey. Prezident Putin bu meselege dair noqtai-nazarını açıqtan bildirdi. Men, buña cevap olaraq – Ukrainağa dair noqtai-nazarlarımıznıñ farqlı olğanında razılaşmaq keregmizni söyledim», – dep, Boltonnıñ sözlerini naqil ete.

Con Bolton, AQŞnıñ siyasetini özü degil de, prezident ömürge keçirgenini ilâve etti.

Bolton Rusiye prezidenti Vladimir Putin ile Moskvada iyün 27-de körüşti. Körüşüvden soñ o, subet esnasında, 2016 senesinde AQŞ prezidenti saylavına qarışuvnı köz ögüne alaraq, AQŞ Kongressine kelecek saylavları münasebeti ile Moskvanıñ areketleri aqqında meselege toqunğanını ikâye etti.

Boltonnıñ aytqanına köre, Putin: «2016 senesinde Rusiye devleti tarafından iç bir qarışuv olmadı», dep iddia etti.

AQŞ ve Rusiye prezidentleri iyül 16-da Helsinkide birinci kere körüşecekler.

Donald Tramp ile Vladimir Putin halqara körüşüvlerniñ kuluarlarında eki kere körüşti ve eñ azından sekiz kere telefon ile laqırdı ettiler. 2014 senesinde Qırımnıñ ilhaqından soñ Rusiye ve AQŞ prezidentleriniñ ayrı körüşüvi olmadı.

XS
SM
MD
LG