İyül 2-de Ukrainada oqumağa kirgenlerge ait elekrton kabinetlerniñ qayd etilüvi başlandı. Ukraina Tasil ve ilim nazirliginde Azatlıq Radiosına, o, iyül 25 künü saat 18:00-ğa qadar açıq olacaq, dep bildirdiler.
Artıq iyül 12-den başlap, abituriyentler kabinetlerden universitetlerge kirmek içün arizalar taqdim ete bilecekler. Arizalarnıñ qabul etilmesi iyül 26 künü saat 18:00-ğa qadar açıq olacaq.
Tasil nazirliginde bildirilgen tafsilâtlarğa köre, bu sene elektron şekilde arizalarnı tibbiy, farmatsevtika ve veterinariya yönelişleriniñ bakalavr ve magistr seviyesine ve 11-nci sınıf esasında kence mutehasıs seviyesine oqumağa kirgenler bereler.
Oqumağa kirecek olğan şahıs qayd etilmek içün bu saifege kirmek kerek. Bunıñ içün aşağıdaki malümat kösterilmeli: elektron poçtanıñ adresi, parol ve parolniñ tasdiqlavı, TMB (tışqı müstaqil baalav) sertifikatınıñ malümatı, tolu umumiy orta tasil attestatınıñ malümatı.
2016-2017 senelerinde yaratılğan bütün elektron kabinetler silindi. Oqumağa kirgen şahıs evelden endi kabinetni qayd etip, bu sene kene kirmekni planlaştırsa, oña qayd etüv protsedurasından ğayrıdan keçmek kerek olacaq. Ondan ğayrı, sistemadan iyün 25 ve 26 künlerinde yaratılğan bütün test kabinetleri silindi.
İyün 22-de Ukraina tasil keyfiyetini baalav merkezi, iştirakçilerniñ şahsiy saifelerinde tışqı müstaqil baalavnıñ neticeleri endi yerleştirildi, dep bildirdi.
Ukrain tili ve edebiyatını bergenler testlerni muvafaqiyet ile tapşırdı, aynı zamanda ingliz tilinden TMBniñ iştirakçileri arasında alâcılar daa çoq.
Daa evel Ukraina Tasil ve ilim nazirligi Qırım ve Donbass abituriyentleri içün adım-adım talimatnamelerni derc etti.
Talimatnamelerde, bu territoriyalardan oqumağa kirecek olğanlar aliy oquv yurtlarına tasil merkezleri vastasınen sadeleştirilgen protsedura boyunca nasıl ve ne zaman kire bilecekleri aqqında tafsilâtlı malümatnı tapmaq mümkünler.
Nazirlikniñ malümatına köre, şu cümleden Qırım sakinleriniñ Ukraina aliy oquv yurtlarına sadeleştirilgen protsedura boyunca, yani TMBni keçmeden oqumağa kirmeleri içün 35 «Qırım – Ukraina» tasil merkezi faaliyet kösterecek.
Daa evel Ukraina Tasil ve ilim nazirliginde, Donbass ve Qırımnıñ işğal etilgen territoriyalarında berilgen diplomlar ve diger tasil tasdiqlayıcı vesiqalar ne Ukraina ve ne de dünyanıñ diger devletlerinde tanılmaylar ve adliy quvetke malik degiller.
