Ukraina Tasil ve ilim nazirliginde, Qırım sakinleriniñ Ukraina aliy oquv yurtlarına sadeleştirilgen protsedura boyunca kirmeleri içün 35 «Qırım-Ukraina» tasil merkezi faaliyet kösterecek, dep bildirdiler.
Ukraina nazirliginiñ matbuat hizmeti bergen malümatqa köre, tasil merkezleri iyün 4-ten oktâbr 28-ge qadar Dnepr, Lviv, Kyiv, Harkiv, Herson ve ondan ğayrı Zaporijjâ, Odesa ve Mıkolayiv vilâyetlerinde çalışacaqlar.
Nazirlikte, bu merkezler vastasınen Qırımdan kelgen abituriyentler Ukrainanıñ qatadaki qısmında bulunğan aliy oquv yurtlarına sadeleştirilgen protsedura boyunca, Tışqı mustaqil baalavdan (TMB) keçmeden kire bileceklerini qayd eteler.
Tıpqı keçken senede olğanı kibi, ilhaq etilgen yarımadadan oqumağa kirgenlerge devlet sımarışı ile ayırılğan yerler içün kvotalar berilecek.
Ukraina Tasil nazirliginiñ vekili Svetlana Kretoviç: «2016 senesinde bücet kvotaları boyunca bir buçuq biñ, 2017 senesinde ise endi 2600 yer ayırıldı. Bu yıl bu raqam daa az olmaycaq, yalıñız tasil merkezleriniñ çalışuv muddeti, vesiqalarnı teslim etüv ve oquvğa qabul etilüv muddetleri deñiştirildi», – dedi.
Garantiya etilgen kvota boyunca bücet yerine oqumağa kirmek içün abituriyent böyle bir merkezge ariza berip, tasil deklaratsiyasını (evelden keçken fenlerni bildirerek) toldurmaq ve devlet neticelev attestatsiyası şeklinde eki imtian (ukrain tili ve Ukraina tarihı boyunca) ile saylanğan zenaat boyunca bir imtiannı bermek kerek.
«Qırım-Ukraina» tasil merkezleri aliy oquv yurtları bazasında çalışıp, bu merkezler vastasınen bazaları olğan aliy oquv yurtlarına oqumağa kirmek mümkün.
Nazirlikte, abituriyent Ukrainanıñ başqa bir aliy oquv yurtunda oqumaq istese, o, umumiy protsedura boyunca da oqumağa kirmek mümkün, dep ilâve eteler.
Daa evel Tasil ve ilim nazirliginde, Donbass ve Qırımnıñ vaqtınca işğal etilgen territoriyalarında berilgen tasil vesiqaları em Ukrainada, em de dünyanıñ diger devletlerinde tanımaylar ve uquqiy quvetke malik degiller, dep qayd etken ediler.
İçtimaiy siyaset nazirliginiñ aprel 2-deki vaziyetni aks etken malümatına köre, Ukrainada Donbass ve Qırımdan mecburen köçken 1492590 kişi qayd etildi.
