Tış işleri nazirligi iyülde BMT Halqara mahkemesinden, Rusiye tarafından mahkemeniñ ilhaq etilgen Qırımda Qırımtatar Milliy Meclisiniñ faaliyetini ğayrıdan başlatuv aqqında emiriniñ yerine ketirilüvi mehanizmlarına dair añlatmalarnı bekley.
Bunı iyül 2-de matbuat konferentsiyası esnasında tış işleri naziriniñ muavini Yelena Zerkal bildirdi.
Zerkal: «Biz mahkemege, Rusiyeniñ mahkeme emrini nasıl eda etmek ve Meclisniñ faaliyetini nasıl ğayrıdan başlatmaq kerek olğanını añlatmaq ricasınen müracaat ettik. Bu davada biz, fikrilerine köre, qararnıñ nasıl yerine ketirilmek kerekligine dair şimdi mahkeme qararınıñ çıqarılacağını bekleymiz. Bizde rusiyeliler ile Mecliske dair fikir paylaşunınıñ 2 raundı oldı. Şimdi mahkeme bu meseleni ayrıca çeze», – dedi.
Ukraina, bu añlatmanıñ berilmesine dair BMT Halqara mahkemesine 2018 senesiniñ aprelinde müracaat etti.
Mevzuğa dair: «Meclisni terrorist olaraq köstermek»: FSB BMT Halqara mahkemesine nasıl azırlana
2017 senesinde Ukraina BMT Halqara mahkemesinde Rusiyege qarşı dava açtı. Onıñ maqsadı, Ukrainada terrorizm aktlarına para ayırğanı ve qol tutqanı, em de Ukrainağa qarşı tecavuz aktlarınıñ yapılması çerçivesnde ırqiy diskriminatsiya aktlarında iştirak etkeni içün Rusiyeni mesüliyetke çekmektir.
Ondan ğayrı Ukraina, vaziyetniñ acele areketler talap etkenini köz ögünde tutıp, BMT Halqara mahkemesine, munasip muvaqqat çarelerni qabul etmek ricası ile muracaat yolladı. 2017 senesi aprel 19-da mahkeme, Ukrainanıñ talabına cevaben, Rusiyege qarşı muvaqqat çarelerni körmek qararını aldı.
