Rusiyeniñ kontroli altında olğan Qırımdaki tahqiqat organları, keçken yılnıñ sentâbrinde belli olmağan maskalı şahıslar tarafından evinden alıp ketilip eziyetlengen qırımtatar Renat Paralamovğa qarşı eki cinaiy iş açtılar. Bunı iyün 30-da «Qırım birdemligi» cemiyet birleşmesiniñ oturışuvında Paralamovlar ailesiniñ advokatı Emil Kurbedinov bildirdi.
Kurbedinov: «Tam manada tünevin, arbiy prokuraturanıñ, Renat Paralamovda tintüv yapqan ve ondan soñ onı, başına çuval taqıp, alıp ketken ve eziyetlegen FSB hadimlerine qarşı cinaiy işniñ açılmasını red etkenini bildim. Faqat aynı zamanda, patlayıcı maddeler ve arbiy yedeklerniñ qanunsız qullanıluvına dair maddeler boyunca Renatqa qarşı eki cinaiy iş açıldı.
Advokatnıñ aytqanına köre, Qırım adliyecileri, Paralamov ve diger alıp qaçılğan Qırım sakinleriniñ işlerini halqara maqamlarğa ve şu cümleden BMTniñ eziyetlevler boyunca mahsus maruzacısına bermek içün bütün zarur vesiqalarnı toplaylar.
Adliyeci Lilâ Gemeci: «Keçenlerde biz BMTniñ mahsus maruzacısı ile Qırımda yaqalanğan ve tintüvden soñ evinden belli olmağan tarafqa alıp ketilgenlerge qarşı yapılğan eziyetlevler aqqında subetleştik. Renat Paralamov ve Reşat Ametovnıñ işleri aqqında tafsilâtlı şekilde ikâye ettik. Yaqın vaqıtta, Rusiye Federatsiyasına qarşı iddiada buluna bilmesi içün mahsus maruzacığa mahsus müracaat taqdim etecekmiz», – dedi.
Mevzuğa dair: «Yumruqlar ve elektrik aqımı ile urdılar»: Renat Paralamovnıñ alıp qaçılması ve azat etilmesi
2017 senesi sentâbr 13-te Qırımdaki Seyitler (Nijnegorskiy) qasabasında, qırımlı Renat Paralamovnıñ evinde, telükesizlik hadimleri tarafından «teşkerüv ve tahqiqat areketleri» dep adlandırılğan tintüv yapıldı. Advokat, «teşkerüv»niñ, Paralamovnıñ diniy faalligi ile bağlı ola bilgenini tahmin etti. Şaatlarnıñ aytqanına köre, uniformalarında tanıtuv işaretleri olmağan maskalı adamlar Paralamovnı belli olmağan tarafqa alıp ketti. Daa soñra Paralamovnıñ evinden kitaplar ve noutbuknıñ alınğanı belli oldı.
Paralamov aqrabaları ile sentâbr 14-te kündüz bağlandı. Onı Aqmescitniñ avtovokzalında taptılar. Soñudan Paralamov, «belli olmağanlarnıñ onı eziyetlegenlerini, başına çuval taqqanlarını, açıq teller ile elektrik boşalmalar keçirgenlerini» ikâye etti.
Sentâbr 15-te Paralamovnıñ aqrabaları ile beraber Rusiye FSBsiniñ Qırım boyunca idaresinde bulunğan advokat Emil Kurbedinov, olarnıñ, Rusiye FSBsi Qırım idaresininiñ ziyaretçileri arasında Renat Paralamovnı alıp qaçqanlarından birini tanığanlarını bildirdi.
Bu vaqialardan soñ Paralamov ailesi ile beraber Ukrainanıñ qıtadaki qısmına ketti.
