Fevralniñ 2, cuma künü, daa evel hırsızlap qıynağanları aqqında haber etken Renat Paralamovnıñ aqrabalarını, «sorav» keçirmek içün rusiyeli politsiya bölügine çağırğanlar.
Qırım.Aqiqatqa Paralamovnıñ advokatı Emil Kurbedinov ikâye etkenine köre, rusiyeli küç idaresiniñ hadimleri «onı memuriy cevapkârlıqqa çekmege istey ekenler».
«Maña aqrabaları telefen açtı. Olardan Renat Paralamovnıñ ne yerde olğanını soraycaq ola ekenler. Onı memuriy cevapkârlıqqa çekmege istey ekenler emiş. Olarnı üyle maalinde sorğulaycaq ola ekenler (fevralniñ 2-nde- QA)», – dedi Kurbedinov.
Onıñ szölerine köre, aqrabaları Rusiye politsiyasına, Paralamovnı qıynağan şahıslarnıñ tapılmasınen bağlı ariza yazğan ekenler.
Advokat o vaqıtqace «Paralamovnıñ ne yerde olğanını kimse aytmaycağını» qayd etti.
Sentâbrniñ 13-de saba Qırımnıñ Seitler qasabasında yaşağan qırımlı Renat Paralamovnıñ evinde küç idaresiniñ hadimleri «tedqiqat ve taqiqat areketleri» dep adlandırğan tintüv ötkergen edi. Advokatnıñ tahminlerine köre, «teşkerüv» Paralamovnıñ diniy saadaki faalliyetinen bağlıdır. Şaatlarnıñ aytqanlarına köre, maska kiygen ve urbasından kim ekenligi belgisiz olğan şahıslar Parlamovnı belli olmağan tarafqa alıp ketken. Keççe belli olğanı kibi, olar onıñ kitap ve notebookını çekip alğanlar.
Paralamov sentâbrniñ 14-de kündüz soy-soplarınen bağlandı. O, Aqmescit avtovokzalından tapıldı. Paralamov «kim olğanı belli olmağan insanlar oña azap çektirgenini, başına çuval kiydirgenini, elektrik aqım qullanılğanını» tarif ete.
Sentâbrniñ 15-de Paralamovnıñ soy-soplarınen beraber Qırımdaki Rusiye FSB idaresiniñ binası yanında bulunğan advokat Emil Kurbedinovnıñ aytqanına köre, olar FSB binasına kirgenlerden biri Renat Paralamovnıñ qaçırılmasında iştirak etken birisi olğanını tanığanlar.
