Yaltadaki «Hizb ut-Tahrir işi» figurantı, Qırım aq-uquq qorçalayıcısı Emir-Useyin Kuku, Rostov-na-Donu şeeri tahqiqat izolâtorında açlıq ilân etip, mümkün derecede keniş olğan insanlar dairesine qırımtatarlarğa qarşı cinaiy işlerniñ uydurılması aqqında» malümatnı yetkizmek istey. Bunı iyün 30-da onıñ ömür arqadaşı Meryem Kuku Aqmescitte «Qırım birdemligi» cemiyet birleşmesiniñ oturışuvında ikâye etti.
«Aqayımnı adekvat, sabırlı, küçlü adam olaraq bilem. Ve onıñ, bir andeki can ıntıluvından degil de, ölçep ve tüşünip bu qararğa kelgeninden eminim. Tutqan açlığınıñ terroristler ve ekstremistler olaraq beftan qabaatlanğan ve iftira etilgenlerge qarşı yapılğan bütün qanunsızlıqlar, Qırımda halqımızğa qarşı yapılğan tazyiq ve zülüm, sozulğan tahqiqatlar ve kerçek cinayetçiler arasında insanlarğa iç de kelişmegen vaziyette tutuluvğa qarşı narazılıq olğanından eminim. Bu, teatr oyunlarınıñ sanalaştırılmasına oşağan ve amelde er kün olıp keçken qapalı mahkemeler, salâhiyetsiz ekspertler ve mütehassıslar tarafından baltanen yontulıp azırlanğan ekspertizalar, tayin etilgen cezalarnıñ deşetlice büyük müddetlerine qarşı narazılıqtır», – dedi o.
Ondan ğayrı, Meryem Kuku, ömür arqadaşınıñ açlıq başlağanı aqqında yalıñız haberdar etilgenini, onıñ Rusiye ükümetine taqdim etken talaplar ve şartlar cedveliniñ ise yalıñız advokatı Kukunı Rostovdaki tahqiqat izolâtorında ziyaret etken soñ belli olacağını qayd etti.
Yaltadaki «Hizb ut-Tahrir işi» figurantı Emir-Useyin Kuku iyün 26-da açlıq ilân etti.
Mevzuğa dair: «Üküm yaznıñ soñuna qadar çıqarılacaq»: «Yalta altılığı»nıñ işi nasıl ileriley
Mayısnıñ soñunda Şimaliy Kavkaz okrugınıñ arbiy mahkemesi Yaltadaki «Hizb ut-Tahrir işi»niñ altı figurantınıñ tevqif müddetini üç ayğa uzattı.
Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada yaqalandılar. Olarnı Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Ukraina Tış işleri nazirligi Rusiyeden Yaltadaki «Hizb ut-Tahrir işi» figurantlarınıñ azat etilmesini talap ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olar diniy alâmetke köre taqip etile, dep sayalar. Advokatlar, Rusiye uquqqoruyıcı organları tarafından bu iş boyunca taqip etilgenlerniñ çoqusı qırımtatar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq işğal etilgen territoriyada işğal etken devletniñ qanunlarını tatbiq etmekni yasaq ete.
