Aqmescitte «Qırım birdemligi» cemiyet birleşmesi iştirakçileriniñ ayda bir kere yapılğan oturışuvı başlandı.
Qırım.Aqiqat muhbiriniñ bildirgenine köre, körüşüvde 80-ge yaqın kişi toplandı. Mevcüt olğanlar arasında Qırım siyasiy mabüsleriniñ aqrabaları, advokatlar ve ukrain faaliyetçileri buluna.
«Qirim birdemligi»niñ koordinatorlarından biri, Bağçasaraydaki «Hizb ut-Tahrir işi» figurantınıñ oğlu Dilâver Memetov kiriş sözünde: «Biz, tazyiqlarğa baqmadan, zorbalıqsız küreşimizni devam ettiremiz ve bugün, ayda bir kere keçken toplaşuvımızğa kelgenlerniñ episini selâmlaymız», – dedi.
Qırım.Aqiqat muhbiriniñ malümatına köre, körüşüv ananeviy cemaat duası ile başlandı.
Qırımtatar faaliyetçisi Mustafa Seydaliyev körüşüv esnasında: «Biz halqımız, aqrabalarımız ve yaqınlarımız ile bağlı problemalarğa ketken sayın daa sıq rastkelemiz. Cemaatımız buña deral qarşılıq köstermek kerek. Biz, işlerniñ böyle ketişatına baş egmegenimizni köstermek kerekmiz», – dedi.
«Qırım birdemligi»niñ oturışuvları ayda bir kere keçe.
Yanvar 27-de Suvdağda «Qırım birdemligi» cemiyet teşebbüsiniñ oturışuvına Rusiye OMONınıñ hadimleri keldi. Telükesizlik hadimleri, olarğa «bu adres boyunca silâlı toplaşuv keçe», dep telefon etkenlerini bildirdiler. Olar, tedbir iştirakçilerinden pasportlar köstermesini talap etip, aksi alda episini avtozaklarğa yüklep, poliske alıp ketecekleri ile qorquzdılar.
İlhaqtan soñ Qırımda faaliyet köstergen Rusiye ükümeti tarafından mustaqil jurnalistler, cemiyet faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarınıñ evlerinde muntazam surette kütleviy tintüvler yapıla.
