Mustafa Cemlevniñ apayını taşığan aydavcı Ahtem Mustafayev Rusiye FSBsiniñ Aqmescitteki idaresinde buluna. Bunı iyün 28-de «Qırım birdemligi» birleşmesi bildire.
Birleşmeniñ malümatına köre, Mustafayevniñ evinde yapılğan tintüv esnasında Rusiye telükesizlik hadimleri Ahtemnen beraber babasını da alıp ketti, lâkin daa soñra babasını evge ketirdiler.
«Qırım birdemligi»nda bildirilgenine köre, Qırım advokatı Edem Semedlâyev prokuraturağa, uquqiy yardım köstermek içün Mustafayevler qorantasına (evlerinde tintüv yapılğanda – QA) yiberilmegenine dair şikâyet yazdı. Daa soñra Semedlâyev Rusiye FSBsiniñ Aqmescitteki idaresine Ahtem Mustafayevge ketti.
Al-azırda yarımadadaki Rusiye uquqqoruyıcıları vaziyetni izalamaylar.
Bundan evel qırımtatar faaliyetçisi Zair Smedlâyev, iyün 28-de Bağçasarayda qırımtatar halqınıñ lideri Mustafa Cemlevniñ apayı Safinarnıñ aydavcısı Ahtem Mustafayevniñ evi tintilgenini bildirdi. Daa soñra, Ahtem telükesizlik hadimleri tarafından belli olmağan tarafqa alıp ketildi, dep bildirildi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler yapalar.
