Link açıqlığı

Saatnıñ esas haberi

Qırımlı Ramazanov onı eziyetlegen Rusiye telükesizlik hadimlerini tanımağa azır – advokat


Rusiye telükesizlik hadimleri Qırımda tintüv yapa
Rusiye telükesizlik hadimleri Qırımda tintüv yapa

Ekstremistik fikirler ayttı dep şübheli tanılğan qırımtatar İsmail Ramazanov, yaqalanuvı esnasında onı eziyetlegen Rusiye telükesizlik hadimleriniñ tanılmasını keçirmek talabınen muracaat etti. Bunı Qırım.Aqiqat muhbirine «Agora» halqara insan aqlarını qorçalav gruppasınıñ advokatı Aleksey Ladin bildirdi.

Advokatnıñ aytqanına köre, Ramazanovnıñ işinde Maksimenko adlı kişi şaat olaraq keçe. Tahqiqatnıñ malümatına köre o, Ramazanovğa ait dep iddia etilgen fikirler aytılğan Zellodaki gruppanıñ idarecisi ola. Bunıñnen beraber, yaqalanğan künü onı köteklegen uquqqoruyıcılardan biriniñ soyadı da aynıdır.

Ladin: «İsmail maña, uquqqoruyıcı organlarnıñ hadimleri onı hizmet avtomobilinde köteklegende ve eziyetlegende – yani parmaqlarını qayırğanda, boğğanda ve urğanda – olar, aralarındaki birine, Maksimenko Aleksandr Viktoroviç dep muracaat ete ediler, dep añlatqan edi. Bu kişi maskasız edi. İsmail onıñ fotorobotını sızdı, ve biz onı sorğu protokolına ilâve ettik. Ondan ğayrı, imayem altında bulunğan şahıs, yaqalanğanından soñ oña konvoylıq etken hadimler arada bir maskalarını çıqarğanları içün, olarnıñ tanılması ve olarnen yüzleştirilmesi keçirilsin, dep rica etti. Daa biz, sanki gruppanıñ idarecisi olğan şaat Maksimenkonıñ tanılmasını keçirüv boyunca muracaat ettik. Çünki bir cinaiy iş içün Maksimenkolar pek çoq oldı», – dep yekün çekti.

Bu mevzuğa dair: Aleksey Ladin: «İsmail Ramazanovnıñ işinde milleti – qabaatnı ağırlağtırğan vaziyettir»

Advokat Ramazanovnıñ işi boyunca yapılğan tilşınaslıq ekspertizasınen tanış olıp, ekspertniñ salâhiyetli olğanından şübhelendi.

Ladin: «Mende ekspertizağa pek çoq sual peyda oldı. İçinde kontekstten çekip alınğan ibareler kösterildi. Ekspertizanı, artıq Suleyman Kadırovnıñ işi boyunca tanış olğan FSB eksperti Vinogradov keçirdi. Vinogradov, onda aliy malümat ve «tilşınas» ihtisası boyunca nasıldır qoşma kurslar olğanını bildire. Men bilgenim qadar ise onda filologiya saasındaki degil de, tibbiyet saasındaki aliy malümat bar. Bu sebepten, ekspertniñ hulâsalarını oqumasañ bile, onıñ salâhiyetine dair şübheler peyda ola», – dep añlattı.

İyün 19-da Ramazanovğa Rusiye Cinayet kodeksindeki 282-nci maddeniñ 1-nci qısmı (duşmanlıq ve nefret qozğama ve bir gruppa şahıslarnı milliy alâmetke köre aşalama) ve 222-nci maddeniñ 1-nci qısmı (patronlar saqlama) boyunca tüzetilgen qabaatlav bildirildi. Ramazanov qabaatını tanımadı.

İsmail Ramazanov, yanvar 23-te Rusiye telükesizlik hadimleri Novıy Mirdeki evini tintken soñ ekstremizmniñ propagandasında qabaatlandı. Daa soñra mahkeme yaqalanğan şahısnı tevqif etti.

XS
SM
MD
LG