Qırımda tahqiqatçı, ekstremistik fikirler aytqanından şübheli tanılğan qırımtatar İsmail Ramazanovğa tüzetilgen qabaatlavnı bildirdi. Bunı Qırım.Aqiqat muhbirine «Agora» halqara insan aqlarını qorçalav gruppasınıñ advokatı Aleksey Ladin bildirdi.
Onıñ aytqanına köre, Ramazanovğa Rusiye Cinayet kodeksindeki 282-nci maddeniñ 1-nci qısmı (duşmanlıq ve nefretni qozğama ve bir gruppa şahıslarnı milliy alâmetke köre aşalama) ve 222-nci maddeniñ 1-nci qısmı (qanunsız olaraq patronlar saqlama) boyunca qabaatlav bildirildi.
Tergevci Ramazanovnı qabaatlavnıñ maiyeti boyunca sorğuladı. Qırımlı öz qabaatını tanımadı.
Advokatnıñ aytqanına köre, imayesi altında olğan şahıs patronlar saqlağanına dair, olar oña ait olmağanlarını bildirdi. Onıñ aytqanına köre, patronlarnı tintüv vaqtında evine «polis hadimi ketirip qoydı ve o kişi, Ramazanovnıñ aqlında qaldı». Bu münasebet ile o, bu kişiniñ tanımasını yapıp, ondan soñ onıñnen yüzleştirme yapılmasını istedi.
Ekinci madde boyunca qabaatlavğa dair Ramazanov ifade berip oturmadı, çünki qabaatlanğan olaraq celp etilmesi aqqında qararda onıñ qabaatı olaraq ilân etilgen aytqan sözleri yazılmadı.
Bu mevzuğa dair: Aleksey Ladin: «İsmail Ramazanovnıñ işinde milleti – qabaatnı ağırlağtırğan vaziyettir»
İsmail Ramazanov, yanvar 23-te Rusiye telükesizlik hadimleri Novıy Mirdeki evini tintken soñ ekstremizmniñ propagandasında qabaatlanğan edi. Daa soñra mahkeme, şübheli tanılğanı bildirilgen şahısnı tevqif etti.
Rusiyeniñ Qırım boyunca Tahqiqat komitetinde, internet rediosı vastasınen ekstremistik materiallarnıñ tarqatılmasında qabaatlanğan Aqmescit rayonınıñ sakinine qarşı tergevciler tarafından cinaiy işniñ açılğanını bildirdiler.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
