Rusiyeniñ kontroli altında olğan Qırım Yuqarı mahkemesinde iyün 20-de ekstremizmde qabaatlanğan İsmail Ramazanov, Ukraina vatandaşı olğanını, ve oña berilgen Rusiye pasportını tanımağanını ilân etti. Bunı Qırım.Aqiqat muhbiri bildire.
Ramazanov munaqaşalar esnasında: «Rusiye pasportını maña, olıp keçken vaqia aldında qarşı-qarşığa qoyup, berdiler. Bu vesiqada bir sıra hatalar yapıldı, ve men onı tanımayım. Mende Ukraina vatandaşlığı olğnanı ile ğurur duyam. Maña bu devlet pek çoq şey berdi, tasil berdi, ev berdi. Şimdi ise dört yıl keçer keçmez diger bir ülke meni azatlıqtan marum ete», – dedi
O, tahqiqatçınıñ vatandaşlığını, tahqiqat izolâtorında tutuluv şeklindeki sıñırlav tedbiriniñ uzatılması içün bir manaçıq olaraq qullanğanını, lâkin aynı zamanda Ukraina devlet organları tarafından berilgen bütün vesiqalarını tutıp alğanını ilâve etti.
Bu mevzuğa dair: Ramazanovnıñ işi: «ekspertiza» ve şübheli şaatlar
Ramazanov: «Tahqiqat, menim diger devletniñ territoriyasına qaça bilecegimni ayta, lâkin Qırım – menim vatanımdır, mende başqası yoq. Mende bir yerge ketmek niyetim yoq, özümni qabaatsız sayam ve bunı advokatımnıñ yardımınen bütün qanuniy usullardan faydalanıp isbatlaycam», – dep yekün çekti.
Qırımtatar, özüne bildirilgen qabaatlarğa «quru laf» dep, olarnı uquqqoruyıcı organlar tarafından milliy ve diniy alâmetke köre yapılğan taqipler sayğanını dedi.
İyün 20-de mahkeme, ekstremizmniñ propagandasından şübheli sayılğan Ramazanovnıñ tevqifini uzattı.
İsmail Ramazanov, yanvar 23-te Rusiye telükesizlik hadimleri Novıy Mirdeki evini tintken soñ ekstremizmniñ propagandasında qabaatlanğan edi. Daa soñra mahkeme, şübheli tanılğanı bildirilgen şahısnı tevqif etti.
Rusiyeniñ Qırım boyunca Tahqiqat komitetinde, internet rediosı vastasınen ekstremistik materiallarnıñ tarqatılmasında qabaatlanğan Aqmescit rayonınıñ sakinine qarşı tergevciler tarafından cinaiy işniñ açılğanını bildirdiler.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
