Kremlniñ kontroli altında olğan Qırım Yuqarı mahkemesi, ekstremizniñ propagandasından şübheli tanılğan İsmail Ramazanovnıñ advokatı Aleksey Ladin tarafından, imayesi altında olğan şahısqa tahqiqat izolâtorında tutuluv şeklindeki sıñırlav tedbiriniñ bir ayğa uzatılmasına qarşı berilgen şikâyetni red etti.
Qırım.Aqiqat muhbiriniñ bildirgenine köre, tevqif etilgen şahıs tahqiqat izolâtorında iyül 16-ğa qadar qalacaq.
Advokat, muhakeme etilgenge alternativ, azatlıqtan marum etilüv ile bağlı olmağan sıñırlav tedbiriniñ tayin etilmesini istey edi.
Advokat, Ramazanovnıñ tahqiqat izolâtorında bulunması esnasında onıñnen iç bir tahqiqat areketi keçirilmedi, dep ikâye etti.
Daa evel Kremlniñ kontroli altında olğan Aqmescit rayon mahkemesi Ramazanovnıñ tevqifini iyül 16-ğa qadar uzattı.
Bu mevzuğa dair: Aleksey Ladin: «İsmail Ramazanovnıñ işinde milleti – qabaatnı ağırlağtırğan vaziyettir»
İsmail Ramazanov, yanvar 23-te Rusiye telükesizlik hadimleri Novıy Mirdeki evini tintken soñ ekstremizmniñ propagandasında qabaatlanğan edi. Daa soñra mahkeme, şübheli tanılğanı bildirilgen şahısnı tevqif etti.
Rusiyeniñ Qırım boyunca Tahqiqat komitetinde, internet rediosı vastasınen ekstremistik materiallarnıñ tarqatılmasında qabaatlanğan Aqmescit rayonınıñ sakinine qarşı tergevciler tarafından cinaiy işniñ açtırılğanını bildirdiler.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
