Qarasuvbazarda iyün 18-den 19-ğa keçer gecesinde belli olmağan şahıslar caminiñ qorasına natsist simvolikasını sızdılar. Bunı Qırım.Aqiqatqa qırımtatar faaliyetçisi Nariman Celâl bildirdi.
Celâl: «Belli natsist simvolları, sözler ve diger edepsiz resimler sızıldı. Şusı da diqqatqa lâyıqtır ki, bu cami Resul Velilâyevniñ (Qarasuvbazardaki tintüvlerden soñ tevqif etilgen iş adamı, hayriyeci, Bekir Çoban-zade fondınıñ qurucısı – QA) paralarına quruldı, o, baş hayriyecisi. Bu camige qarşı böyle bir şey iç bir vaqıt yapılmadı. Soñki 10 yıl içinde camiler, musulman mezarlıqlarına qarşı vandalizm vaqialarınıñ iç birisi qabaatlılarnıñ yaqalanuvı ile yekünlenmedi, iç bir mahkeme olmadı», – dedi.
Onıñ aytqanına köre, bu vaqia boyunca Rusiye polisine ariza yazıldı.
O: «Polis vekilleri çağırıldı, olar pek çoq olıp keldi. Şaatlar, aselet qırımtatarlarnı yolladılar, deyler. Bu iş qasten böyle yapıldımı, bilmeyim – bunı aytmaq küç. Lâkin ariza berildi», – dep ilâve etti.
2018 senesi fevral 11-de Aqmescitniñ «Strelkovaya» rayonında vandallar caminiñ malını bozdı.
İş adamları Velilâyev ve Bariyev Qırımda aprel 26-da yaqalandı. O künü Qarasuvbazarda Rusiye telükesizlik hadmleri Velilâyevge ait Qırımdaki «Güzel» ticaret ağı ve «KrımOpt» şirketiniñ tükânlarını tinttiler.
Tintüvden soñ qırımtatar iş adamları Resul Velilâyev ve Ali Bariyev Qırımdan alıp ketildi.
Daa soñra Velilâyevni 2 ayğa tevqif etip, Moskvadaki Lefortovo tahqiqat izolâtorına apis ettiler. Qırımda oña qarşı Rusiye Cinayet kodeksindeki 238-nci maddeniñ 2-nci qısmı («Telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi) boyunca iş açıldı.
