Qarasuvbazarda aprel 26-da ötkerilgen tintüvlerden soñ yaqalanğan ve ilhaq etilgen Qırımdan alıp ketilgen qırımtatar iş adamı Resul Velilâyevni Moskvadaki Lefortovo tahqiqat izolâtorına (SİZO) yolladılar.
Bunı «Bizim balalar» Qırım hayriye vaqfınıñ vekili Lilâ Bucurova Facebookta yazdı.
Bucurova: «Telükesizlik hadimleri Resul Velilâyevni, aprel 26-da evinde ve bütün aqrabalarınıñ evlerinde yapılğan tintüvlerden soñ birden yanlarına alıp kettiler. Ve aynı şu gece Moskvağa, Lefortovo apishanesine yolladılar. Qırım içün bile iç de standart bir vaziyet degil. Misal içün, prokuraturanıñ sabıq Qırım vitse-premyeri Rustam Temirgaliyevni, «Oşçadbank»nıñ Qırımdaki şubesinden 100 mln hrivna ile 300-den ziyade kg altınnı hırsızlağanında nasıl etip qabaatlağanını er kes hatırlay, lâkin onı degil yalıñız tevqif etmediler, atta Qazaqstandaki Tatarstan temsilciliginiñ başlığı olmağa izin berdiler», – dep yazdı.
Onıñ aytqanına köre, Resul Velilâyev yarımadada iş adamı ve Qarasuvbazarda Cuma camini qurğan hayriyeci olaraq belli.
Lilâ Bucurova: «Ne içün (Velilâyevni Lefortovoğa yolladılar – QA)?. İnanmazsıñız! Oña ait olğan tükânda muddeti keçken azıqlar (güya) tapılğan içün. Ve er bir supermarkette, er bir yarı yertöledeki gastronomda top-top olğan bu çeşit cinayetlerni (eger olar kerçekten de olğan olsa?) baqmağa, yalıñız Moskvadaki mahkemeniñ salâhiyeti bar emiş! Resul Velilâyev içün sıñırlav tedbiri tayin etildi – 2 ay muddetine tevqif. O, Rusiye Cinaiy kodeksiniñ 238-nci maddesiniñ 2-nci qısmı boyunca berilgen bu cezanı Lefortovoda ödeycek», – dep bildirdi.
Aprel 26 sabasında Qarasuvbazarda «Güzel» ticaret ağı ve «KrımOpt» şirketinniñ tükânlarında Rusiye telükesizlik hadimleri tarafından tintüvler yapılğanı belli oldı.
Qırımtatar Milliy Meclisiniñ reisi Refat Çubarov qırımtatar iş adamları, hayriyeciler ve qırımtatar milliy areketiniñ iştirakçileri Ali Bariyev, Asan Bariyev, Remzi Velilâyev, Resül Velilâyev, Ekrem Velilâyev, Zera Velilâyeva ve olardan ayrı yaşağan yetişken balalarınıñ evlerine Rusiye telükesizlik hadirmleriniñ tintüvler ile kelgenini bildirdi.
Çubarovnıñ malümatına köre, Rusiye telükesizlik hadimleri Resul Velilâyev ve Ali Bariyevni Rusiye Tahqiqat komitetiniñ Qırım boyunca idaresine alıp kettiler. Olarnı üç saattan ziyade sorğulağan soñ Rusiye territoriyasına alıp kettiler.
«RİA Krım»nıñ bildirgenine köre, Rusiye Tahqiqat komitetiniñ Qırım boyunca idaresinde, «al-azırda adresleri boyunca tintüvler yapılğan iş adamları ya da şirketlerge qarşı idare tarafından alıp barılğan işler yoq», dediler. Rusiyedeki «Kommersant» neşiriniñ malümatına köre, tintüvni OMON uruşmacılarnıñ yardımı ile FSB hadimleri keçirdi.
«Güzel» ticaret ağı ve «KrımOpt» şirketi iri bir iş adamı ve hayriyeci Resül Velilâyevge aitler.
İlhaqtan soñ Qırımnı aqiqatta idare etken Rusiye ukümet organları muntazam surette mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerini kütleviy şekilde tinteler.
