Link açıqlığı

Saatnıñ esas haberi

Aprel 26-da Qarasuvbazarda Rusiye telükesizlik hadirmleri qırımtatar iş adamları, hayratçılar ve qırımtatar milliy areketiniñ iştirakçileriniñ evlerini tinteler. Bunı Qırımtatar Milliy Meclisiniñ reisi Refat Çubarov özüniñ Facebooktaki saifesinde yaza.

Çubarov: «Rus işğalcileri qırımtatar iş adamları, hayratçılar ve qırımtatar milliy areketiniñ iştirakçileri Ali Bariyev, Asan Bariyev, Remzi Velilâyev, Resül Velilâyev, Ekrem Velilâyev, Zera Velilâyeva ve olardan ayrı yaşağan yetişken balalarınıñ evlerine tintüvler ile basıp kirdi», – dep qayd etti.

Onıñ sözlerine köre, aynı vaqıtta Qırımnıñ başqa rayonlarında da – ağa-qardaş Velilâyevlerge ait Qırımnıñ ğıda mahsulatı distributsiyası saasında yetekçi şirket olğan «KrımOpt»nıñ istisal bazaları ve onlarca şirket tükânlarında tintüvler yapılmaqta.

Çubarov: « Bütün tintüvler yapılğan yerlerde atıcı silâlar ile silâlanğan mahsus qısımlarnıñ bayağı büyük küçleri ketirildi, tintüvler yapılğan yerler dört taraftan qamaçavğa alındı. Qırımdan, Qarasuvbazarda «KrımOpt» ofisi yanında qararnen 400 kişiniñ toplanğanı aqqında bildireler. Al-azırda tintüvler yapılğan diger yerlerge de qırımtatarlar kele», – dep qayd ete.

Daa evel Qırım alâqa gruppasınıñ koordinatorı Abdureşit Cepparov aprel 26 sabasında Qırımda Qarasuvbazarda «Güzel» ticaret ağınıñ tükânlarında ve em de «KrımOpt» şirketinde Rusiye telükesizlik hadimleriniñ tintüvler yapqanını bildirdi.

Al-azırda Rusiye telükesizlik hadimleri ve Kremlniñ kontroli altında olğan Qırım ukümeti tarafından bu vaziyetke dair berilgen izaatlar yoq. Tafsilâtlar ögrenile.

«Güzel» ticaret ağı ve «KrımOpt» şirketi iri bir iş adamı ve hayratçı Resül Velilâyevge ait.

Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.

XS
SM
MD
LG