Rostov-na-Donu şeerindeki Şimaliy Kavkaz okrugınıñ arbiy mahkemesi iyün 19-da Yaltadaki «Hizb ut-Tahrir işi» boyunca oturışuvında tilşınas ekspertniñ sorğulanmasını başladı. Bunı Qırım.Aqiqat muhbirine Muslim Aliyevniñ advokatı Sergey Legostov bildirdi.
Onıñ aytqanına köre, ekspert hanım oturışuvğa azır degil edi, ekspertizanı mahkemege tolu kölemde taqdim etmedi.
Legostov: «İmayeniñ noqtai-nazarı: ekspert salâhiyetsizdir, çünki bu saadaki er kes tarafından qabul etilgen ıstılalarını qabul etmey. Bizim fikrimizce, o, öz hulâsalarını, qabaatlav içün «elverişli» olğan qalıp boyunca yazdı», – dep añlattı.
Advokat, tilşınas ekspert oturışuv esnasında yalıñız ekspertizanıñ hulâsasını taqdim etti, albuki onıñ kiriş ve tetqiqat qısımları da müim, dep izaladı. Mahkeme, ekspertten yetmegen vesiqalarnıñ azırlanmasını talap etti ve iyül 11-ge qadar teneffüs ilân etti.
Mahkeme oturışuvında iştirak etken ekspert tarafından berilgen izaat şimdilik yoq.
Bu mevzuğa dair: «Üküm yaznıñ soñuna qadar çıqarılacaq»: «Yalta altılığı»nıñ işi nasıl ileriley
Mayısnıñ soñunda Şimaliy Kavkaz okrugınıñ arbiy mahkemesi Yaltadaki «Hizb ut-Tahrir işi»niñ altı figurantınıñ tevqifini üç ayğa uzattı.
Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada yaqalandılar. Olarnı Rusiyede yasaq etilgen «Hizb ut-Tahrir» siyasiy İslâm teşkilâtına alâqalı olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Ukraina Tış işleri nazirligi Rusiyeden Yaltadaki «Hizb ut-Tahrir işi» figurantlarınıñ azat etilmesini talap ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olar diniy alâmetke köre taqip etile, dep sayalar. Advokatlar, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanlarını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
