Rusiye telükesizlik hadimleri, mayıs 18 sabasında babası Yunus Seytumerovnıñ evinde yapqan tintüvlerinden soñ Eski Qırım sakinesi Nazife Seytumerovanı yanlarına alıp kettiler. Bunı «Qırım birdemligi» birleşmesi içün bergen izaatta cemiyet imayecisi Mustafa Seydaliyev bildirdi.
Seydaliyev: «Al-azırda, aqrabalarından alğan malümatımızğa köre – evde anası ve qız qardaşı qaldılar – onı (Nazife Seytumerovanı – QA), telefonında, al-azırda Ukrainanıñ qıtadaki qısmında bulunğan ömür arqadaşı ile nasıldır yazışmasını tapqanları sebebinden yanlarına alıp kettiler. Şimdilik tafsilâtlar ögrenile», – dedi.
İyün 18 sabasında Rusiye telükesizlik hadimleri Eski Qırımda qırımtatarlarnıñ evini tinttiler.
Qırım.Aqiqat adiseniñ tafsilâtlarını ögrene. Rusiye telükesizlik hadimleri tarafından bu hususta açıq menbalarda izaat berilmedi.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
