Rusiye telükesizlik hadimleri Eski Qırımda nevbetteki qırımtatar evini tintti. Bunı iyün 18-de «Qırım birdemligi» birleşmesi içün bergen izaatta cemiyet imayecisi Mustafa Seydaliyev bildirdi.
Seydaliyev: «Ev kimniñ tarafından ve neniñ esasında teşkerildi, belli degil. Uquqqoruyıcı organlarınıñ hadimleri iç bir protokol tizmedi, özüni tanıtmadı, adiseni qanunsız olaraq qayd ete ediler. Teşkerüvden soñ Yunus Seytumerovnıñ qızını yanlarına alıp kettiler», – dep bildirdi.
Qırım.Aqiqat adiseniñ tafsilâtlarını ögrene. Rusiye telükesizlik hadimleri tarafından bu hususta açıq menbalarda izaatlar berilmedi.
İlhaqtan soñ Qırımdaki faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübheli sayılğan Qırım musulmanlarınıñ evlerinde muntazam surette kütleviy tintüvler keçire.
