Qırımdan telefon vastasınen yapılğan muracaatlarğa köre, ilhaq etilgen yarımadadaki abituriyentlerde Ukrainanıñ qıtadaki qısmında tasil aluvğa meraq arta. Bunı mayıs 25-te Qırım.Aqaiqat Radiosı efirinde Ukrainadaki «Açıq siyaset» fondu» cemiyet teşkilâtınıñ reisi İrina Jdanova bildirdi.
Cemiyetçi: «Açıq siyaset» fondu»nda sıcaq telefon hattı endi üç yıldan berli çalışa. Bu yıl Qırım ve Ukrainanıñ şarqından muracaatlar sayısınıñ artqanını aytmaq isteyim. Bıltır abituriyentlerniñ yalıñız 10%-i kvotalarnı qullandı – maña köre, bu pek az. Menim fikrimce, informatsion kampaniyanı alıp barmaq pek muim», – dep qayd etti.
Ukraina Tasil ve ilim nazirliginiñ malümatına köre, cümleden Qırım sakinleri içün Ukraina aliy oquv yurtlarına sadeleştirilgen şekilde – TMBden (Tışqı mustaqil baalavdan) keçmeden – oqumağa kirmek içün 35 «Qırım-Ukraina» tasil merkezi faaliyet kösterecek.
Daa evel Ukraina tasil ve ilim nazirliginde, Donbass ve Qırımnıñ vaqtınca işğal etilgen territoriyalarında berilgen diplomlar ve diger tasil vesiqaları ne Ukrainada ve ne de dünyanıñ diger memleketlerinde tanılmaylar ve uquqiy quvetke malik degiller, dep qayd ete ediler.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
