Qırım adliyecisi Rustem Kâmilev, Kremlniñ kontroli altında olğan Bağçasaray rayon mahkemesiniñ, Bağçasarayda «Salaçıq» qırımtatar qavehanesiniñ çalışmasını toqtatuv aqqında qararına qarşı şikâyet bermek niyetinde. Bunı qorçalayıcı Qırım.Aqiqat muhbirine bildirdi.
Kâmilev: «Salaçıq» qavehanesi boyunca mahkeme protsessindeki siyasiy komponenti aqqında söz yürsetilmedi. Prokuratura tarafından dava açmaq içün berilgen arizada, eñ azından, beş sanitariya-epidemiologiya normasınıñ bozuluvı aqqında aytıla: suvnıñ keyfiyetinden tutıp, aşnıñ pişirilmesi içün ayrı odalarnıñ olmamasına barğance. Biz, bugünki qararnı qolğa alğanımız ile, oña qarşı mutlaqa şikâyet berecekmiz», – dedi.
Aynı zamanda Kâmilev, prokuraturanıñ, qavehaneniñ işinde sanki bozuluvlarnıñ tapılması aqqında qararı «tam manada siyasiy harakterge malik», dep saya.
Buña ilâve olaraq o: «Er kesniñ bilgenine köre, qavehaneniñ saibi – qırımtatar Marlen Asanov. Şimdi o, «Hizb ut-Tahrir işi» figurantı. Bugün mahkeme qavehaneniñ işini toqtatmaq qararını çıqardı. Biz buña, Marlenniñ qorantasına tazyiq etüv, dep qıymet kesemiz», – dedi.
Kremlniñ kontroli altında olğan Bağçasaray rayon mahkemesi mayıs 24-teki oturışuvında «Salaçıq» kervan-sarayı faaliyetiniñ toqtatılmasına dair qarar aldı.
Daa evel qavehaneniñ memuriyeti, «Rusiye mahkemesiniñ qararı ile» «Salaçıq» öz işini vaqtınca toqtata, dep bildirdi.
2017 senesiniñ oktâbrinde Bağçasaraydaki «Hizb ut-Tahrir işi» boyunca tevqif etilgen Marlen Asanov muessiseniñ saibi ola.
2017 senesiniñ oktâbrinde Rusiye telükesizlik hadimleri Bağçasaraynıñ altı sakinini yaqaladı. Bular – Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov. FSB olarnı Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
