Kyivge, Azav deñizi üstündeki kontrolini Rusiyeniñ menfaatına ğayıp etmemek içün akvatoriyada arbiy mevcudiyetini arttırmaq ve Moskva ile onıñ qullanıluvı aqqında bütün añlaşmalarını bozmaq kerek. Bunı Qırım.Aqiqat Radiosı efirinde Ukraina prezidentiniñ QMCde daimiy temsilcisi Boris Babin söyledi.
Prezidentniñ Qırımdaki temsilcisi: «Rusiyede Azav deñizine dair planlar bar. Ve o, anda, Ukraina ne qadar qarşılıq köstermekten vazgeçse, o qadar kenişlemege devam etecek. Vazifede çalışqanımnıñ birinci kününden başlap, Azav deñizinde ADQ (Arbiy deñiz quvetleri) ve deñiz bekçileriniñ quvetleştirilmesi meselesini ortağa qoya edim. Bunı iç bir muzakereler ve beyanatlarnen toqtatmağa çare yoq. Cariy olğan muqaveleler boyunca rusiyeliler bu akvatoriyanıñ er bir noqtasında ilmiy teşkerüvler keçire bileler! Bu muqavelelerni denonsatsiya etip, munasip halqara rejimni ilân etmek ve içki suvlar aqqında qanunnı qabul etmek kerek», – dep qayd etti.
Rusiye tarafından açıq menbalarda bu hususta berilgen izaatlar yoq.
Mevzuğa dair: Akvatoriya içün meydan muarebesi: Rusiye Azav deñizindeki Ukraina gemileriniñ qatnavına nasıl keder ete
Ukraina İnfrastruktura nazirligi, Rusiye tarafından, yüksekligi ile gemilerniñ keçmesini sıñırlağan köpürniñ qurulmasından soñ gemilerniñ Keriç boğazından Ukrainanıñ limanlarına keçmeleri ile bağlı sıñırlamalardan kelecek vastasız zararlarnı yılda 500 hrivna olaraq qıymetlendire.
Rusiye Devlet Duması, Rusiye gvardiyasına, qurulayatqan Keriç köprüne ve bunıñ kibi de Keriç boğazınıñ tübündeki gaz hattı ve energiya köprüne bitişken zonalardan gemilerni evakuatsiya etmek aqqını bergen ukümetniñ qanun leyhasını birinci muzakereden soñ qabul etti.
Keriç boğazı üstünden qurulğan köpürniñ avtoyol qısmı yengil avtomobillerniñ areketi içün mayıs 16-da açıldı. Köpürniñ demiryol qısmı şimdilik qurulıp bitirilmedi.
Rusiye prezidenti Vladimir Putin Keriç boğazından keçit qurmaq kerekligi aqqında Qırımnıñ işğalinden aman soñra, 2014 senesiniñ martında söyledi. Köpürni 2018 senesine qadar qurmaqnı ve 2019 senesiniñ yazında işletüv içün açmaqnı vade ettiler. Ukraina tarafı Rusiye ile köpürniñ qurulması aqqında mauqaveleden 2014 senesinde – Qırım Rusiye tarafından ilhaq etilgen soñ çıqtı.
