Aqmescit rayonında alıp qaçılğan Qırımtatar Milliy Qurultayınıñ delegatı Asan Egiz köteklengen alda tapıldı. Bunı Facebookta «Qırım birdemligi» cemiyet birleşmesi bildire.
Bildirüvde: «Asan Egiz köteklengen alda tapıldı. Al-azırda advokat Ayder Azamatov ve Asannıñ qardaşı Abdurahman Egiz onı hastahanege alıp keteler», – denile.
Bundan ğayrı bu malümatnı Qırımtatar Milliy Meclisiniñ reisi Refat Çubarov da tasdiqlay.
«Asannı acele surette Aqmescitteki 6 nomeralı şeer hastahanesine alıp keteler. Asannı pek köteklediler. Birazdan soñ advokat Ayder Azamatovdan izaatlar bekleymiz», – dep yazdı o.
Mayıs 23-te Aqmescit rayonındaki Colman (Pionerskoye) köyü yanında belli olmağan şahıslar Qırımtatar Milliy Qurultayı delegatı Asan Egiz yaqaladılar. Rusiye FSBsiniñ Qırımdaki idaresinde Egizni yaqalağanlarını inkâr ettiler.
Rusiye telükesizlik hadimleri tarafından açıq menbalarda bu hususta izaatlar berilmedi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
