Qırımtatar halqınıñ lideri, Ukraina halq deputatı Mustafa Cemilev AQŞta, ilhaq etilgen Qırımda insan aqlarınıñ bozuluvı meselesini muzakere etmek içün Memuriyetniñ vekilleri, kongressmenler ve senatorlar ile körüşmek niyetinde. Bu, onıñ Facebooktaki saifesinde bildirile.
Bildirüvde: «Ukrainada topraq bütünliginiñ tiklenilmesi, Rusiye tarafından vaqtınca işğal etilgen Qırımda insan aqları ve ürriyetleriniñ bozuluvı ve, ondan ğayrı, cümleden, Qırımda ve Rusiye territoriyasında apis etilgen siyasiy mabüslerniñ azat etilüvi kontekstinde yarımadada qırımtatar halqı ve ukrain faaliyetçilerine qol tutuv, AQŞ Memuriyetiniñ vekilleri, kongressmenler, senatorlar ve ekspertler toplulığınıñ vekilleri ile körüşüvlerniñ anahtar mevzuları olacaq», – denile.
Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti.
Azatlıq Radiosı muhbiriniñ malümatına köre, Mustafayevni «Hizb ut-Tahrir işi» boyunca yaqaladılar, onı mahkemege qadar vaqtınca tutuluv izolâtorına yerleştirdiler.
Rusiye FSBsi, «Hizb ut-Tahrir» teşkilâtında iştirak etkenlerinden şübhe etilgen eki kişiniñ Qırımda yaqalanğanını bildirdi. Yaqalanğanlarnıñ adları bildirilmedi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
