Link açıqlığı

Saatnıñ esas haberi

Aqmescitte, bunıñ arfesinde «Hizb ut-Tahrir işi» boyunca yaqalanğan Edem Smailov tevqif etildi


Edem Smailov mahkeme yanında, Aqmescit, 2018 senesi mayıs 22 künü

Kremlniñ kontroli altında olğan Aqmescitteki Kiyevskiy rayon mahkemesi mayıs 22-de, bunıñ arfesinde Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtında iştirak etüv şübhesi ile yaqalanğan qırımtatar, musulman Edem Smailovnı 20 künge tevqif etti.

Qırım.Aqiqat muhbiriniñ bildirgenine köre, Smailov tahqiqat izolâtorında iyün 9-ğa qadar qalacaq.

Advokat Konstantin Rustemov: «Tarafımdan qorçalanğan şahısqa qarşı tevqif etüv şeklinde sıñırlav tedbiriniñ saylanmasına dair aynı bunıñ kibi qarar alındı. Muddetniñ 20 kün olması, olarnıñ (Smailov ve Mustafayevniñ) işiniñ Bağçasaraydaki ekinci «Hizb ut-Tahrir» gruppasınıñ işinen birleştirilmesine dair qararnıñ artıq alınğanınen bağlı. Ev apisi aqqında muracaat, tahmin etilgeni kibi, red etildi», – dep añlattı.​

«Qırım birdemligi» koordinatorı Dilâver Memetovnıñ malümatına köre, Smailov soñki 15 yıl devamında Bağçasarayda musulman diniy merasimleriniñ keçirilmesi ile oğraşa edi.

Daa evel Aqmescitteki mahkeme, Bağçasarayda bunıñ arfesinde yaqalanğan qırımtatar faaliyetçisi Server Mustafayevni tevqif etti.

Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti.

Rusiye FSBsi, Rusiye ve ilhaq etilgen yarımadada yasaq etilgen «Hizb ut-Tahrir» teşkilâtında iştirak etkenlerinden şübhe etilgen eki kişiniñ Qırımda yaqalanğanını bildirdi.

İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG