Link açıqlığı

Saatnıñ esas haberi

Aqmescit: mahkeme qırımtatar faaliyetçisi Server Mustafayevni tevqif etti


Server Mustafayev
Server Mustafayev

Aqmescitte Rusiyeniñ kontroli altında olğan Kiyevskiy rayon mahkemesi bunıñ arfesinde Bağçasarayda yaqalanğan qırımtatar faaliyetçisi Server Mustafayevni tevqif etti.

Onıñ advokatı Sergey Legostovnıñ bildirgenine köre, faaliyetçi iyün 9-ğa qadar tevqif etildi.

Qorçalayıcınıñ malümatına köre, oturışuv qapalı rejimde keçti. Mahkeme advokatnıñ, Mustafayevge ev apisi şeklinde sıñırlav tedbirniñ saylanmasına dair talabını red etti.

Legostovnıñ aytqanına köre, imayesi altında olğanğa qarşı çıqarılğan qabaatlavlarda, 2016 senesinde Bağçasaraydaki camilerden birinde Rusiyede ve onıñ tarafından ilhaq etilgen Qırımda yasaq etilgen «Hizb ut-Tahrir» teşkilâtı iştirakçileriniñ gizli körüşüvi aqqında aytıla.

Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti.

Azatlıq Radiosı muhbiriniñ malümatına köre, Mustafayevni «Hizb ut-Tahrir işi» boyunca yaqaladılar, onı mahkemege qadar vaqtınca tutuluv izolâtorına yerleştirdiler.

Rusiye FSBsi, Rusiye ve ilhaq etilgen yarımadada yasaq etilgen «Hizb ut-Tahrir» teşkilâtında iştirak etkenlerinden şübhe etilgen eki kişiniñ Qırımda yaqalanğanını bildirdi. Yaqalanğanlarnıñ adları bildirilmey.

İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG