Kanadanıñ eñ büyük şeeri – Torontonıñ belediyesi mayıs 18 cuma künü qırımtatar halqını Qırımdan sürgün etüv qurbanlarınıñ hatırasına ve Qırımdaki qırımtatarlar ile birdemlikte olğanına bir işaret olaraq birinci kere qırımtatar bayrağını köterecek.
Kanadadaki Ukraina elçilginde bildirgenlerine köre, merasim yerli vaqtı ile üylede (Qırımda saat 19:00-da) Toronto belediyesi yanında başlanacaq. Diplomatik muessisesiniñ malümatına köre, ondan ğayrı Kanadadaki ukrain ve qırımtatar cemaatlarınıñ iştiraki ile mitingniñ ötkerilmesi planlaştırıldı.
Ukraina elçisi Andrey Şevçenko: «Qırımtatarlar içün küreş – Ukraina içün, dünyanıñ üzerinde qurulması kerek olğan adalet içün küreştir. Kanadadaki dostlarımız bizim ile aynı duyğularnı is etkenleri içün pek hoşnutmız. Bu, qoltutuvnıñ tesirli, quvetli bir imasıdır.
Elçilikte, qırımtatar areketiniñ lideri Mustafa Cemilev ve ondan ğayrı Qırımtatar Milliy Meclisi reisiniñ muavini Ahtem Çiygoz merasimniñ mahsus musafirleri olacaqlar, dep qayd ettiler.
Qırımtatar cemiyet erbapları Kanadağa, Qırımda etnik taqipler ve siyasiy repressiyalar aqqında malümatnen keldiler.
Kanadadaki Ukraina elçiliginde, planlaştırılğan merasim, Kanadada Qırımtatar halqınıñ sürgün elilüv kününi añma ananesini devam ettire, dep qayd ettiler. 2016 senesinde bu künde qırımtatar bayrağı Ontario eyaleti parlamenti binasınıñ ögünde, 2017 senesinde ise Kanadanıñ paytahtı Ottava belediyesiniñ ögünde köterilgen edi.
Mayıs 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
Rusiye tarafından ilhaq etilgen Qırımda resmiy olmağan bütün matem tedbirleri yasaq etildi. Olarnı keçirmek ıntılışları sert bir şekilde toqtatılalar.
