Poloniya Tış işleri nazirligi Keriç boğazı üstünden köpürniñ qurulmasını halqara uquqnıñ qaba bir bozuluvı saya. Bu hususta Varşavanıñ tış işleri muessisesi tarafından yapılğan beyanatta aytıla.
Beyanatta: «Rusiye tarafından, Ukrainadan izin almadan ve BMT Baş Assambleyasınıñ qararlarına rağmen köpürniñ qurulması – halqara uquq printsipleriniñ nevbetteki qaba bozuluvıdır», – denile.
Poloniya TİNinde, Rusiyeniñ areketleri, «Rusiye memuriyetiniñ, Ukraina ile çatışmanıñ barışıqlı yolnen çezilmesine ıntılğanları aqqında defalarca aytqanlarına zıt keleler», dep sayalar.
Varşavanıñ TİNinde: «Biz Rusiye tarafını Ukrainanıñ topraq bütünligi ve mustaqilliginiñ bozulmasını devam etmekten vazgeçmege davet etemiz», – dep ilâve ettiler ve, BMT Baş Assambleyasınıñ qararlarına binaen, dünya toplulığı Qırımdaki «mustaqillik referendumı»nı qanunsız tanıdı ve böylelikle Ukrainanıñ suvereniteti, mustaqilligi ve topraq bütünligine qol tutqanını ifade etti, dep hatırlattılar.
Keriç boğazı üstünden qurulğan köpürniñ avtoyol qısmı yengil avtomobillerniñ yürüşi içün mayıs 16-da açıldı.
Rusiye ukümeti qurulmaqta olğan Keriç köpründe naqliyat havfsızlığınıñ temin etilmesi ile bağlı işlerniñ yapılması boyunca devlet kontraktınıñ muddetini 2019 senesi dekabr 1-ge qadar uzattı.
Ukraina prezidenti Petro Poroşenko, Rusiye tarafından ilhaq etilgen Qırımda Keriç köprüniñ qanunsız qurulması, Kremlniñ halqara uquqqa itibar etmegeniniñ nevbetteki şaatlığıdır, dedi.
Avropa Birligi ve AQŞ Rusiye territoriyası ile ilhaq etilgen Qırım arasında Keriç köprüniñ qısmen açılmasını sert bir şekilde tenqit etti.
Rusiye prezidenti Vladimir Putin Keriç boğazından keçit qurmaq niyeti aqqında Qırımnıñ işğalinden aman soñra, 2014 senesiniñ martında ilân etti. Köpür 2018 senesine qadar qurulacaq ve 2019 senesiniñ yazında işletüv içün açılacaq, dep vade etildi. Ukraina tarafı Rusiye ile köpürniñ qurulması aqqında añlaşmadan 2014 senesinde – Qırım Rusiye tarafından ilhaq etilgen soñ çıqtı.
