NATO, qomşu Rusiye territoriyasından ilhaq etilgen Qırımğa Keriç köpründeki avtoyol qısmınıñ açılmasına Ukraina suverenitetiniñ bozuluvı olaraq qıymet kese. Bunı AFP bildire.
«NATO Qırım köprüne Ukraina suverenitetiniñ bozuluvı olaraq qıymet kese», – yaza neşir.
Daa evel AQŞnıñ Devlet departamenti Ukraina ukümetinden izin almadan qurulmaqta olğan Keriç köprüniñ qısmen açılmasını taqbih etti.
Mayıs 16 sabasında Keriç boğazı üstünden qurulğan köpürniñ avtoyol qısmı yengil avtomobillerniñ yürüşi içün açıldı.
Bunıñ arfesinde qurulmaqta olğan Keriç köprüniñ bir qısmınıñ açılışında Rusiye prezidenti Vladimir Putin iştirak etti.
Mayıs 15-te Ukraina prezidenti Petro Poroşenko, Rusiye tarafından ilhaq etilgen Qırımda Keriç köprüniñ qanunsız qurulması, Kremlniñ halqara uquqqa itibar etmegeniniñ nevbetteki şaatlığıdır, dedi.
Avropa Birligi Rusiye territoriyası ile ilhaq etilgen Qırım arasında Keriç köprüniñ qısmen açılmasını sert bir şekilde tenqit etti.
Rusiye ukümeti qurulmaqta olğan Keriç köpründe naqliyat havfsızlığınıñ temin etilmesi ile bağlı işlerniñ yapılması boyunca devlet kontraktınıñ muddetini 2019 senesi dekabr 1-ge qadar uzattı.
Rusiye prezidenti Vladimir Putin Keriç boğazından keçit qurmaq niyeti aqqında Qırımnıñ işğalinden aman soñra, 2014 senesiniñ martında ilân etti. Köpürni 2018 senesine qadar qurmaqnı ve 2019 senesiniñ yazında işletüv içün açmaqnı vade ettiler.
Ukraina tarafı Rusiye ile köpürniñ qurulması aqqında añlaşmadan 2014 senesinde – Qırım Rusiye tarafından ilhaq etilgen soñ çıqtı.
