Link açıqlığı

Saatnıñ esas haberi

Vaşington: Keriç köprüniñ qısmen açılmasını taqbih etemiz, Qırım – Ukrainadır


AQŞ Devlet departamentiniñ spikeri Hizer Nauert
AQŞ Devlet departamentiniñ spikeri Hizer Nauert

AQŞ Devlet departamenti Ukraina ukümetinden izin almadan qurulmaqta olğan Keriç köprüniñ qısmen açılmasını taqbih etti.

Bildirüvde: «Köpürniñ qurulması sadece Rusiye tarafından Qırımnıñ qanunsız zaptı ve işğalini tasdiqlamaq teşebbüsi olmayıp, aynı zamanda Ukrainanıñ Azaq deñizindeki territorial suvlarına yekâne yol olğan Keriç boğazından keçe bilecek gemilerniñ ölçülerinde sıñırlamalar sebebinden navigatsiyağa keder ete», – denile.

Ondan ğayrı Devlet departamentinde, AQŞnıñ bu leyhağa celp etilgen şahıslar ve subyektlerge qarşı sanktsiyalarnıñ kenişletkenini qayd ettiler.

AQŞnıñ tış siyaset muessisesi: «AQŞnıñ Qırım ile alâqalı olğan bu ve diger sanktsiyaları, Rusiye yarımada üzerindeki kontrolni Ukrainağa qaytarmağance quvette qalacaqlar», – dep bildirdi.

Mayıs 16 sabasında Keriç boğazı üstünden qurulğan köpürniñ avtoyol qısmı yengil avtomobillerniñ yürüşi içün açıldı.

Bunıñ arfesinde qurulmaqta olğan Keriç köprüniñ bir qısmınıñ açılışında Rusiye prezidenti Vladimir Putin iştirak etti.

Mayıs 15-te Ukraina prezidenti Petro Poroşenko, Rusiye tarafından ilhaq etilgen Qırımda Keriç köprüniñ qanunsız qurulması, Kremlniñ halqara uquqqa itibar etmegeniniñ nevbetteki şaatlığıdır, dedi.

Avropa Birligi Rusiye territoriyası ile ilhaq etilgen Qırım arasında Keriç köprüniñ qısmen açılmasını sert bir şekilde tenqit etti.

Rusiye ukümeti qurulmaqta olğan Keriç köpründe naqliyat havfsızlığınıñ temin etilmesi ile bağlı işlerniñ yapılması boyunca devlet kontraktınıñ muddetini 2019 senesi dekabr 1-ge qadar uzattı.

Rusiye prezidenti Vladimir Putin Keriç boğazından keçit qurmaq niyeti aqqında Qırımnıñ işğalinden aman soñra, 2014 senesiniñ martında ilân etti. Köpürni 2018 senesine qadar qurmaqnı ve 2019 senesiniñ yazında işletüv içün açmaqnı vade ettiler.

Ukraina tarafı Rusiye ile köpürniñ qurulması aqqında añlaşmadan 2014 senesinde – Qırım Rusiye tarafından ilhaq etilgen soñ çıqtı.

XS
SM
MD
LG