Rusiye FSBsi, mayıs 10-da Aqyar civarındaki tintüvden soñ yaqalanğan yerli sakinni, Rusiye ve onıñ tarafından ilhaq etilgen Qırımda yasaq olunğan «Hizb ut-Tahrir» teşkilâtında iltirak etkeninden şübheli saya.
Bunı Rusiyedeki haber agentlikleri, FSBniñ Qırım boyunca idaresi tarafından berilgen malümatqa atıfta bulunıp, bildireler.
«İnterfaks»: «FSB idaresiniñ Tahqiqat bölügi, Rusiye Cinaiy kodeksiniñ 205.5 maddesiniñ 2-nci qısmında (terroristik teşkilâtınıñ faaliyetinde iştirak etüv) qayd etilgen cinayetniñ işlenmesinden şübheli sayılğan, 1986 senesinde doğğan Aqyar şeeriniñ sakinine qarşı cinaiy iş açtı», – dep, FSB matbuat hismetiniñ sözlerini naqil ete.
Bidirilgenine köre, yaqalanğannıñ yaşağan yerinde tintüv yapıldı, onıñ adı bildirilmey.
FSBde, «İslâmiy azat etüv fırqası» («Hizb ut-Tahrir») tarafından çıqarılğan ekstremistik edebiyat, teşviqat veraqaları ve bunıñ kibi de alâqa vastaları tapılıp, musadere etildi», dep bildirdiler.
Mayıs 10 sabasında Aqyarnıñ Balıqlava rayonındaki Hayto (Tılovoye) köyünde tintüvler yapılğan soñ Ernes ve Enver Seytosmanovlarnıñ yaqalanuvı aqqında bildirildi. Daa soñra ağa-qardaşnıñ Rusiye FSBsiniñ şubesine alıp ketilgeni ve olardan biri azat etilgeni aqqında belli oldı.
Advokat Emil Kurbedinov, Aqyar civarında yaqalanğanlarnıñ Aqyardaki «Hizb ut-Tahrir işi» boyunca Rusiyede mahküm etilgen Nuri Primov ile yaqın soylar olğanını tasdiqladı.
2017 senesiniñ sentâbrinde Rostov-na-Donu şeerindeki Şimaliy Kavkaz okrugınıñ arbiy mahkemesi uküm çıqardı. Oña muvafıq olaraq «Hizb ut-Tahrir işi» boyunca qabaatlanğan Aqyar sakinleri Ferat Sayfullayev, Rustem Vaitov ve Nuri Primovğa umumiy rejimli tertipke qoyucı koloniyada beşer yıl berildi.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ diniy alâmetke köre taqip etilgenlerini tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
