AB azaları olğan devletlerniñ Daimiy temsilciler komiteti mayıs 8-deki oturışuvında, büyük ihtimal ile ilhaq etilgen Qırımda Rusiye saylavınıñ ötkerilmesi munasebeti ile Rusiyege qarşı yañı sanktsiyalar cedveli aqqında maddeni baqıp çıqacaq.
AB Şurasınıñ saytında derc etilgen kün tertibinde: «Ukrainanıñ topraq bütünligi, suvereniteti ve mustaqilligini bozğan ya da olar içün telüke doğurğan areketlerge qarşı sıñırlayıcı tedbirler – yañı cedveller, qarar ve reglamentniñ ömürge keçirilmesidir», – denile.
Bu maddege dair vesiqa şimdilik AB Şurasınıñ saytında derc etilmedi.
Aprel 30-da Azatlıq Radiosı jurnalisti Rikard Yozvâk, Avropa Birliginiñ Rusiye tarafından ilhaq etilgen Qırımda Rusiye prezidenti saylavınıñ ötkerilmesi içün cevapkâr olğan beş şahısnıñ aktivlerini buzlatmaq niyetinde olğanını bildirdi.
Yozvâk Twitterdeki saifesinde: «AB, Qırımda mart ayında Rusiye prezidenti saylavınıñ teşkil etilmesi içün cevapkâr olğan beş kişiniñ aktivlerini buzlatmaq ve vizalarını yasaq etmek niyetinde. AB nazirleri olarnı mayısnıñ ortasında yasaq etecekler. Olar, (Ukrainanıñ topraq bütünligi, suvereniteti ve mustaqilligini bozmaları içün – QA), artıq 150 kişi ve 38 teşkilâtnı içine alğan sanktsiyalar cedveline ilâve etilecekler», – dep bildirdi.
Rusiyede ve onıñ tarafından ilhaq etilgen Qırımda mart 18-de prezident saylavında rey berüv olıp keçti. Resmiy Kyiv ve bir sıra halqara teşkilâtlar ile bir çoq dünya devletleri yarımadadaki saylavnı tanımaylar.
Mart 19-da Ukraina prezidenti Petro Poroşenko, Rusiye tarafından ilhaq etilgen Qırımda keçirilgen saylavnıñ neticelerine «sıfır derecesinde» ve «uquqiy neticeleri olmaycaq», dedi.
Ukraina Yuqarı Radası mart 22-de ilhaq etilgen Qırım territoriyasında Rusiye prezidenti saylavınıñ tanılmaması aqqında qarar içün rey berdi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
