Link açıqlığı

Saatnıñ esas haberi

Devlet departamentiniñ Ukraina meseleleri boyunca mahsus temsilcisi Kurt Volker, «Qırımnıñ Rusiye tarafından işğali insan aqlarınıñ ciddiy bozuluvına sebep oldı», dep bildirdi. Bunı o, mayıs 8-de AQŞ Kongressi yanındaki Helsinki komissiyasınıñ brifinginde söyledi, dep bildire Azatlıq Radiosı.

Volker, AQŞnıñ ilhaq etilgen Ukraina territoriyasına dair siyaseti deñişmeycegine işaret etti: «Bizim Qırımğa dair siyasetimiz aşkâr – biz Rusiye tarafından Qırımnıñ ilhaqını şimdi tanımaymız ve kelecekte de tanımaycaqmız. Rusiyeniñ istilâsı ve bu bölgeni işğal etmesi insan aqlarınıñ ciddiy bozuluvlarına ketirdi».

Bunıñ arfesinde Volkner, «Moskva, üç Baltıq devletine mustaqillikni nasıl qaytarğan olsa, Ukrainağa Qırımnı da öyle qaytarmaq mümkün», dep bildirgen edi.

Ondan ğayrı o, Rusiye Qırım yarımadasını Ukrainağa qaytarmağance oña qarşı sanktsiyalarnıñ tazyiqı devam etecek, dep qayd etti.

Human Rights Watch halqara insan aqlarını qorçalav teşkilâtı, ilhaq etilgen Qırımda Rusiye ukümeti, yarımadada başqaca fikirlevni bastırmaq maqsadınen türlü manaçıqlarnen qırımtatarlarğa tazyiqini arttırdı, dep qayd etken edi.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG