Moskva, tıpqı üç Baltıq devletine, olarnı uzun muddet içinde sovet cumhuriyetleri sayğanına baqmadan mustaqillikni qaytarğan kibi, Qırımnı da Ukrainağa qaytarmaq mümkün. AQŞnıñ Ukrainağa dair muzakereler meseleleri boyunca mahsus temsilcisi Kurt Volker böyle eminlikni mayıs 7-de ifade etti, dep bildire «Ukrainform».
«Ukrinform»: «Olar (rusiyeliler, Qırımnıñ qaytarılması perspektivaları aqqında – QA) bir türlü şeyler aytacaq, biz – başqa türlü şeyler aytacaqmız, lâkin perspektivada olacağını körecekmiz. Baltıq devletleri Sovet Birligi tarafından onlarca yıl devamında işğal etilgen edi ve eñ soñunda er şey deñişti», – dep, Volkerniñ sözlerini naqil ete.
Bu munasebet ile o, Qırım problemasınıñ bayağı murekkep olğanını qayd etti. Lâkin o, Baltıq devletleriniñ ilhaqını tanımama siyaseti munasebeti ile seleflerge «büyük coşqunlıq» ile baqqanını qayd etti.
Ondan ğayrı, Volkner, Rusiye Qırım yarımadasını Ukrainağa qaytarmağance oña qarşı sanktsiyalarnıñ tazyiqı devam etecek, dep qayd etti.
Volkner: «Başqa bir devletni istilâ etüv ve toprağını zapt etüv, ilhaq etüv, öz mülkü ilân etüv – bu asla yol berilmeycek şeylerdir, ve bizim bunıñnen razılaşmağa niyetimiz yoq», – dedi.
Bunıñ arfesinde Rusiye prezidenti Vladimir Putin Rusiye ukümetine «Qırım ve Aqyarnıñ integratsiyası» içün minnetdarlığını bildirdi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
