Kremlniñ saytı, Rusiye prezidenti Vladimir Putin mayıs 6-da Rusiye ukümeti ile körüşüvinde «hususan Qırım ve Aqyarnı integratsiya etüv boyunca işini qayd etti», dep bildire.
Rusiye prezidentiniñ saytı: «Hususan ukümetniñ Qırım ve Aqyarnı devletniñ içtimaiy-iqtisadiy saasına integratsiya etüv boyunca işini, bölge sakinleriniñ problemalarını operativ şekilde çezgenini qayd etecem», – dep, Putinniñ sözlerini naqil ete.
Mayıs 7-de Rusiye ukümeti, Rusiye devlet başlığınıñ altı yıllıq mandatınıñ soñuna yetmesi sebebi ile vekâletlerini teslim etecek. «Vazifeni eda etken» statusında qalacaq ukümet azaları, Rusiye baş icra etici organınıñ yañı erkânı teşkil etilecegine qadar bekleycekler.
Aynı şu künü Putin Rusiye prezidenti vazifesine kirerek, dörtünci kere yemin etecek ve böylelikle akimiyetiniñ 18 yıllıq muddetini devam ettirecek.
Mayıs 5-te polis Rusiyeniñ türlü şeerlerinde «O, bizim içün çar degil» tedbirlerinde 1200-den ziyade kişini yaqaladı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
