Aqyar civarındaki Hayto (Tılovoye) köyünde yaqalanğan qırımtatarlar Ernest ve Enver Seytosmanovlar ve olarnıñ anası Gülnaranı nomeraları olmağan beyaz avtomobilde tsivil urbalı şahıslar alıp ketti. Bunı mayıs 10-da Facebookta Qırım advokatı Emil Kurbedinov, adiseniñ şaatlarına atıfta bulunıp, bildirdi.
Kurbedinov: «Şaatlarnıñ aytqanına köre, camları qoyu tüslü olğan nomeralarsız mikroavtobus ile kelgen ve özüni eñ başından agressiv tutqan tsivil urbalı insanlar eki qırımtatarnı ve olarnıñ hasta anasını evden alıp ketti. Belli olmağan tarafqa alıp kettiler. Şaat, «alıp qaçqanlar» özüni tanıtmadı, dey. Al-azırda alıp qaçuvlar aqqında arizalar berildi! FSB ve İİNniñ şeritinde bildirüvler qaldırıldı», – dep yazdı.
İmayeci, «Aqyar civarında alıp qaçılğanlar»nıñ Aqyardaki «Hizb ut-Tahrir işi» boyunca Rusiyede mahküm etilgen Nuri Primovnıñ yaqın soyları olğanını tasdiqladı.
Qırım.Aqiqat muhbiriniñ malümatına köre, yaqalanğanlar beyaz renkli nomerasız avtomobil ile alıp ketildi, tintüv Balıqlava rayonınıñ Hayto köyünde yapıldı. Qomşular, anasınıñ oğullarına bir qaç kün evel kelgenini ikâye ettiler.
Mayıs 10 sabasında Aqyarnıñ Balıqlava rayonındaki Hayto köyünde tintüvler yapılğan soñ Ernes ve Enver Seytosmanovlarnıñ yaqalanuvı aqqında bildirildi. Daa soñra Rusiye telükesizlik hadimleri tarafından ihtimal ile üç kişi yaqalanğanı belli oldı.
Rusiye telükesizlik hadimleri tarafından açıq menbalarda bu hususta şimdilik izaat berilmedi.
2017 senesiniñ sentâbrinde Rostov-na-Donu şeerindeki Şimaliy Kavkaz okrugınıñ arbiy mahkemesi uküm çıqardı. Oña binaen «Hizb ut-Tahrir işi» boyunca qabaatlanğan Aqyar sakinleri Ferat Sayfullayev, Rustem Vaitov ve Nuri Primovğa umumiy rejimli tertipke qoyucı koloniyada beşer yıl berildi.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ diniy alâmetke köre taqip etilgenlerini tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenlerniñ esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd ete.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
