Rusiye FSBsi Rostov-na-Donu şeerindeki Rusiye arbiy mahkemesinden Yaltadaki «Hizb ut-Tahrir işi» materiallarına, sanki qabaatlanğanlarda qabaatlav şaatlarına tazyiq etmek niyetleri olğanını isbatlağan tezkereni ilâve etmege talap etti.
Qırım.Aqiqat muhbiriniñ mayıs 8-de bildirgenine köre, Rostovdaki mahkeme iş materiallarına tezkereni ilâve etti. FSBniñ versiyasına köre, onda işniñ figurantlarından biri, Muslim Aliyev, diger qabaatlı, İnver Bekirovdan qabaatlavnıñ üç şaatına tesir etmekni istegen.
Bunıñ arfesinde Rusiye FSBsiniñ ilhaq etilgen Qırım boyunca başlığı Viktor Palagin mahkemege, tezkereni işniñ materiallarına ilâve etmek ricası ile resmiy muracaatnı teslim etti.
FSBniñ versiyasına köre, tezkere 2017 senesiniñ oktâbrinde Aqmescitniñ tahqiqat izolâtorında tapıldı ve 2018 senesiniñ fevralinde onıñ gizliligi alıp taşlandı.
Aynı zamanda qorçalav Palaginniñ muracaatını, daa evel gizli şaatnıñ, ifadelerini açıqtan bermek ve olarnı qabaatlanğanlarnıñ menfaatına deñiştirmek qararınen bivasta surette bağlaylar.
Advokat Emil Kurbedinov: «Bu, gizliligi alıp taşlanğan şaat içün böyle bir öç aluvdır. Olar, bu şaatqa aqrabalar ya da başqa kişiler vastasınen tazyiq etilgeninde qandırmaq isteyler… Bu tezkereniñ aqiqiy olğanını tahmin etsek bile, men onda iç bir tazyiq körmeyim. Onıñ muellifi şaatqa, insanlarğa qarşı yalancı ifadeler bermek olmağanını añlatmaq istey», – dep izaat etti.
Muslim Aliyevniñ imayecisi Sergey Legostov, işniñ bu basamaqtaki baqılmasında FSBniñ dava iştirakçisi olmağanı içün iç bir türlü resmiy muracaatnı bermege qanuniy aqqı olmağanına ve mahkemeniñ bu tezkereni ilâve etmek qararınıñ esassız olğanına diqqat çeke.
Legostov: «O (tezkere – QA) – vaqtında berilmedi. Ve onı, iş boyunca taraf olmağan organ berdi. Yarın bizde Mesken işletilmesi kontorasından (JEK) bir çilengir bir şeyler ilâve etmek içün kelecek. Prokuror bar, ve deliller köstemek – onıñ işidir», – dep qayd etti.
2016 senesiniñ fevral-aprel aylarında Yaltada Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk yaqalandılar. Olarnı Rusiyede yasaq etilgen «Hizb ut-Tahrir» siyasiy İslâm teşkilâtına alâqalı olğanlarında qabaatlaylar.
Rusiye arbiy mahkemesi Yaltadaki «Hizb ut-Tahrir işi»ni Aqmescitte keçken köçüci oturışuvlarında baqa edi. Ondan soñ tevqif etilgen Qırım sakinlerini Rostov-na-Donu şeerine yolladılar.
Ukraina Tış işleri nazirligi Rusiyeden Yaltadaki «Hizb ut-Tahrir işi» figurantlarınıñ azat etilmesini talap etti.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, olarnıñ diniy alâmetke köre taqip etilgenlerini tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar olğanını ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
