İlhaq etilgen Qırımnıñ Kremlniñ kontroli altında olğan ukümeti, tazyiqnı arttırıp, rejimge sadıq olmağanlarnı qorqu içinde tutmağa tırışa.
Bunı Qırımtatar Milliy Meclisi reisiniñ muavini İlmi Umerov Facebookta yazdı.
Umerov: «Soñki künlerde Qırımda sadıq olmağanlarğa tazyiqnıñ arttırılması közetile. Maqsat ep evelki: er kesni qorqu içinde tutmaq ve susturmaq. Belli iş adamı Resul Velilâyevniñ «muddeti keçken konfetler içün» tevqifi ve Moskvadaki Lefortovo apishanesinde tutulması. Aqyar sakini İgor Movenkonı, Ukraina tarafdarı olğanını köstergen mevamı içün aqiqiy muddet – eki yıl koloniyağa mahküm etilmesi. Ve, niayet, Bağçasarayda, «ukümet»ke tabi insanlar tam manada aydap ketirilgen «qıdırlez» bayramınıñ yapılması», – dep yazdı.
Onıñ yazğanına köre, yarımadanıñ ukümeti, böyle etip, «aqiqiy ayatnıñ dehşetleri yerine «eyi» bir suret kösterecek olalar.
Meclis reisiniñ muavini: «Qırımdan ketken on biñlerce insan; tintüvler, kütleviy yaqalavlar, tek kişilik yaqalavlar, alıp qaçuvlar, eziyetlevler ve öldürüvlerge oğarağan biñlerce insan; mahküm etilgen ve ukümni beklegen onlarca insan; KHVni yoq etüv; advokatlarğa tazyiq; medeniy miras abidelerini mahv etüv; ekologiyanı bozuv… Qırımda olıp keçken bütün şeyler işğalcilerniñ qorqaqlığını köstere», – dep qayd etti ve, Rusiyeniñ areketlerinden qorqmaq kerekmegenini ilâve etti.
Aprel 26-da Qarasuvbazarda Rusiye telükesizlik hadimleri Velilâyevge ait «Güzel» ticaret ağı ve «KrımOpt» şirketinniñ tükânlarını tinttiler.
Tintüvden soñ qırımtatar iş adamları Resul Velilâyev ve Ali Bariyev Qırımdan alıp ketildi.
Qırımdaki «Bizim balalar» hayriye vaqfınıñ vekili Lilâ Bucurovanıñ malümatına köre, Velilâyevni 2 ayğa tevqif etip, Moskvadaki Lefortovo tahqiqat izolâtorına (SİZO) qapadılar. Qırımda oña qarşı Rusiye Cinaiy kodeksiniñ 238-nci maddesiniñ 2-nci qısmı («Telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi) boyunca iş açıldı.
İlhaqtan soñ Qırımda faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarında ötkerilgen kütleviy tintilüvlerni qullana.
