Link açıqlığı

Saatnıñ esas haberi

Tevqif etilgen Velilâyevge şimdilik advokatlarnı yibermeyler – Çiygoz


Ahtem Çiygoz
Ahtem Çiygoz

Moskvadaki Lefortovo tahqiqat izolâtorında (SİZO) tutulğan qırımtatar iş adamı Resul Velilâyevge şimdilik advokatlarnı yibermeyler. Bunı Qırım.Aqiqatqa Qırımtatar Milliy Meclisi reisiniñ muavini Ahtem Çiygoz bildirdi.

Çiygoz: «(İşniñ – QA) bu basamağında qorçalayıcılar yiberilmey. Ondan ğayrı, (Velilâyevniñ tutulğan yeri – QA) Lefortovo olğanı belli. Bu, FSBniñ hususiy apishanesidir. Bu sebepten, em advokatlarnıñ yiberilmesi, em işniñ husularını ögrenüv, em de böyle bir sert şekilde tevqif etilmesiniñ sebepleri boyunca malümat qolaylıqnen berilir, dep tüşünmeyim», – dedi.

Onıñ aytqanına köre, advokatlar tayin etilmegence yalıñız aqrabalar tevqif etilgennen bağ tuta bilecekler.

Çiygoz, Velilâyevge qarşı yañı qabaatlavlar çıqarıla bilecegini ihtimallı saya.

Çiygoz: «Tecribem maña şunı ayta ki, (qabaatlavda – QA) iç bir iqtisadiy maddeden asla bahs etilmeycegine oşay. Büyük ihtimal ile nasıldır gizli şaatlar tapılıp, onı (Velilâyevni – QA) bir de-bir ekstremistik faaliyetke maliy ceetten qol tutqanında qabaatlaycaqlar», – dedi.

Meclis reisi muavininiñ aytqanına köre, Velilâyevniñ azat etilmesi içün bütün halqara meydancıqlar celp etilecek.

Aprel 26-da Qarasuvbazarda Rusiye telükesizlik hadimleri Velilâyevge ait «Güzel» ticaret ağı ve «KrımOpt» şirketinniñ tükânlarını tinttiler.

Tintüvden soñ qırımtatar iş adamları Resul Velilâyev ve Ali Bariyev Qırımdan alıp ketildi.

Qırımdaki «Bizim balalar» hayriye vaqfınıñ vekili Lilâ Bucurovanıñ malümatına köre, Velilâyevni 2 ayğa tevqif etip, Moskvadaki Lefortovo tahqiqat izolâtorına (SİZO) qapadılar. Qırımda oña qarşı Rusiye Cinaiy kodeksiniñ 238-nci maddesiniñ 2-nci qısmı («Telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi) boyunca iş açıldı.

İlhaqtan soñ Qırımda faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarında ötkerilgen kütleviy tintilüvlerni qullana.

XS
SM
MD
LG