Qırımtatar Milliy Meclisi reisiniñ muavini Ahtem Çiygoz, Qırımda yaqalanğan soñ tevqif etilgen qırımtatar iş adamı Resul Velilâyevni azat etmek içün bütün halqara meydançıqlarnıñ celp etileceklerini bildirdi. Bunı o, Qırım.Aqiqat içün bergen izaatlarında bildirdi.
Çiygoz: «Men, bütün halqara meydançıqlarını celp etecekmiz, dep tüşünem! Bundan kimse şübhe bile etmesin! Em Rusiye, em FSBciler, em (Rusiyedeki – QA) prezident, bütün düyada yañğıracaq daa bir işni başlağanlarını bilsinler! Ve biz, bugün Qırımda bulunıp, medeniy yönelişlerge, halqnıñ inkişafına qol tutmağa tırışıp, böyle muşkül vaziyetke oğrağan vatandaşlarımızğa bunıñ kibi munasebet köstergen kişilerge ceza körmeyip yaşamağa bermemiz. Buña asıl da umüt etmesinler. Biz öz vatandaşlarımıznı kimsege horlatmamız», – dedi.
Aprel 26-da Qarasuvbazarda Rusiye telükesizlik hadimleri Velilâyevge ait «Güzel» ticaret ağı ve «KrımOpt» şirketinniñ tükânlarını tinttiler.
Tintüvden soñ qırımtatar iş adamları Resul Velilâyev ve Ali Bariyev Qırımdan alıp ketildi.
Qırımdaki «Bizim balalar» hayriye vaqfınıñ vekili Lilâ Bucurovanıñ malümatına köre, Velilâyevni 2 ayğa tevqif etip, Moskvadaki Lefortovo tahqiqat izolâtorına (SİZO) qapadılar. Qırımda oña qarşı Rusiye Cinaiy kodeksiniñ 238-nci maddesiniñ 2-nci qısmı («Telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi) boyunca iş açıldı.
İlhaqtan soñ Qırımda faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarında ötkerilgen kütleviy tintilüvlerni qullana.
