Aqmescitniñ tahqiqat izolâtorında (SİZO) tutulğan ekstremizmden şübheli İsmail Ramazanovnıñ sağlığı, yaqalavı esnansında köteklengeninden soñ bir kereden fenalaştı. Bunı mayıs 3-te Qırım.Aqiqatqa tevqif etilgenniñ advokatı Aleksey Ladin bildirdi.
Ladin: «Mahkeme oturışuvından evel İsmailnen videokonferentsiya vastasınen laf ete bildim. O, büyreklerinde meseleler çıqqanını ayttı. Bu, yaqalanuvı esnasında ve ondan soñ ilk saatlarda telükesizlik muessisesi, tahminen FSBniñ hadimleri, ondan itiraflar urıp çıqarmaq maqsadınen köteklegenleriniñ aqibetidir. Al-azırda onda ayaqlar şişe ve büyrekler ağıra», – dedi.
Advokatnıñ aytqanına köre, Ramazanov, ekim tarafından teşkerilmesi içün er kün ariza yazacaq, çünki «tecrübeniñ köstergenine köre, birinci arizadan soñ ekim kelmey». Ondan ğayrı, Ladin SİZO memuriyetine öz arizasını yollaycaq.
Advokat: «Onıñ ekim tarafından teşkerilmesi ve oña ilâclarnıñ tayin etilmesini talap etecekmiz. SİZO İsmailge munasip tedaviylev tayin etecegine iç bir hayalımız yoq. Lâkin, iç olmadı, ilâclar tibby kartoçkağa yazılsa, aqrabaları olarnı alıp bere bilecekler.
Daa evel mahkeme Ramazanovnıñ imayesi tarafından, yanında advokatı olmadan qabaatlavını bildirgen tahqiqatçı hanımınıñ areketlerine qarşı berilgen apellâtsiyanı red etti.
Yanvar 23-te Novıy Mirde Rusiye telükesizlik hadimleri, qırımtatar İsmail Ramazanovğa ekstremizmniñ propagandasında qabaatlavnı bildirip, evini tinttiler. Daa soñra mahkeme yaqalanğannı tevqif etti.
Rusiyeniñ Qırım boyunca Tahqiqat komitetinde tahqiqatçılar tarafından, internet-radio vastasınen ekstremistik materiallarnı tarqatqanında qabaatlanğan Aqmescit rayonı sakinine qarşı cinaiy iş açılğanını bildirdiler.
İlhaqtan soñ Qırımda faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarında ötkerilgen kütleviy tintilüvlerni qullana.
