Mayıs 3-te Rusiyeniñ kontroli altında olğan Qırım Yuqarı mahkemesi İsmail Ramazanovnıñ, yanında advokatı olmadan qabaatlavını bildirgen tahqiqatçı hanımınıñ areketlerine qarşı apellâtsiyasını red etti.
Daa evel Aqmescit rayon mahkemesi, tahqiqatçı Alisa Gluhovanıñ böyle areketlerini qanuniy tanıp, advokat Aleksey Ladinniñ şikâyetini red etti.
Daa evel Kremlniñ kontroli altında olğan Qırımdaki Aqmescit rayon mahkemesi, ekstremistik ifadeler qullanğanından şübheli tanılğan İsmail Ramazanovnıñ tevqif muddetini mayıs 18-ge qadar uzattı.
Yanvar 23-te Novıy Mirde Rusiye telükesizlik hadimleri, qırımtatar İsmail Ramazanovğa ekstremizmniñ propagandasında qabaatlavnı bildirip, evini tinttiler. Daa soñra mahkeme yaqalanğannı tevqif etti.
Daa soñra Rusiyeniñ Qırım boyunca Tahqiqat komitetinde tahqiqatçılarnıñ, internet-radio vastasınen ekstremistik materiallarnı tarqatqanında qabaatlanğan Aqmescit rayonınıñ sakinine qarşı cinaiy iş açqanlarını bildirdiler.
İlhaqtan soñ Qırımnı asılında idare etken Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli tanılğan Qırım musulmanlarında kütleviy surette ötkerilgen tintilüvlerni qullana.
