Kremlniñ kontroli altında olğan Qırım Yuqarı mahkemesi aprel 18-de ekstremist deye şübheli tanılğan İsmail Ramazanov tarafından tevqifine qarşı berilgen apellâtsion şikâyetni qanaatlendirmedi. Bunı Qırım.Aqiqat muhbiri bildire.
Ramazanov özü mahkemeden, Qırımnı terk etmek istemegeni içün sıñırlav tedbiriniñ ev apisine deñiştirilmesini istedi.
Ramazanovnıñ advokatı Aleksey Ladin, birinci maqam mahkemesinde tevqifni uzatmaq içün esasnıñ olmağanını, ve Ramazanovnıñ tahqiqattan gizlenmek ve cemaat içindeki faaliyetini devam etmek imkânı olacağı aqqında delillerniñ uydurulğan olğanlarını bildirdi.
Bunıñ arfesinde Kremlniñ kontroli altında olğan Aqmescit rayon mahkemesi ekstremistik ifadelerde bulunğanından şübheli tanılğan İsmail Ramazanovnıñ tevqifini mayıs 18-ge qadar uzattı.
Yanvar 23-te Novıy Mirde Rusiye telükesizlik hadimleri, qırımtatar İsmail Ramazanovğa ekstremizmniñ propagandasında qabaatlavnı bildirip, evini tinttiler. Daa soñra mahkeme yaqalanğannı tevqif etti.
Daa soñra Rusiyeniñ Qırım boyunca Tahqiqat komitetinde, internet-radio vastasınen ekstremistik materiallarnı tarqatqanında qabaatlanğan Aqmescit rayonınıñ sakinine qarşı tahqiqatçılar tarafından cinaiy işniñ açılğanını bildirdiler.
İlhaqtan soñ Qırımnıñ faktik Rusiye ukümeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı dep şübheli tanılğan Qırım musulmanlarına qarşı kütleviy şekilde ötkerilgen tintüvlerni qullana.
