Qırımtatar faaliyetçisi Suleyman Kadırovnıñ advokatı Aleksey Ladin İnsan aqları boyunca Avropa mahkemesine şikâyet bermek niyetinde, dep bildire Qırım.Aqiqat muhbiri.
Ladin bunı, qırımtatar faaliyetçisi Suleyman Kadırovğa daa evel Kefe şeer mahkemesi taraından çıqarılğan ukümni deñiştirmeyip qaldırğan Rusiyeniñ kontroli altında olğan Qırım Yuqarı mahkemesiniñ oturışuvından soñ bildirdi.
Ladin: «Eki maqamda da (insan aqları ve esas urriyetlerine dair – QA) Konvetsiyanıñ bozuluvları oldı. Ondan ğayrı kassatsiyanı, başta Qırım Yuqarı mahkemesiniñ Prezidiumına ve ondan soñ Rusiye Yuqarı mahkemesine berip, soñunace çıqaracaqmız», – dedi.
Advokat: «Bu cinayetniñ esas terkibiy qısmı – diger şahıslarğa muracaat etüv. Kadırov kimsege muracaat etmedi. Bu, bir şey hırsızlamadan hırsızlıq yapmaq kibi. Bu, kör soqaqqa alıp barğan yol. Kadırovğa qarşı çıqarılğan uküm ne qanuniy, ve ne de esaslandırğandır», – dep añlattı.
Qırımtatar faaliyetçisi Suleyman Kadırov qabaatlanğan cinayetinde özüni qabaatlı tanımadı.
Mayıs 3-te Rusiyeniñ kontroli altında olğan Qırım Yuqarı mahkemesi qırımtatar faaliyetçisi Suleyman Kadırovğa daa evel Kefe mahkemesi taraından çıqarılğan ukümni deñştirmeyip qaldırdı.
Qabaatlavnıñ versiyasına köre, Kadırov 2016 senesi martında, özüni Aqmescitten bir qırımtatar olaraq tanıtqan ve Ukrainanıñ kontroli altında olmağan Donetsk ve Lugansk vilâyetlerini azat etmek içün «Qırım» batalyonınıñ meydanğa ketirilmesi aqqında bildirgen nasıldır Demyan Demyanenkonıñ videoroligini repost etti. Bir qaç aydan soñ repostnıñ altında, içinde, cümleden, «Qol tutam, Qırım evelden de, şimdi de ve kelecekte Ukraina olacaq» sözleri olğan Kadırovnıñ izaatı peyda oldı. Oña qarşı Rusiye Cinaiy kodeksiniñ 280.1 maddesi boyunca iş açıldı. Qabaatlav FSB ekspertleri tarafından yapılğan ve Kadırovnıñ izaatında Rusiyeniñ topraq bütünliginiñ bozulmasına davet olğanını isbatlağan ekspertizağa esaslana.
2017 senesiniñ aprelinde Rusiyeniñ maliy monitoringi boyunca hizmeti Kadırovnı ekstremistler ve terroristler cedveline kirsetti.
Kadırov özü, cinaiy işi – öz noqtai-nazarını faal surette ifade etkenine ve aq-uquqnı qorçalav saasındaki faaliyetlerine cevaben mahsus hizmetler tarafından yapılğan provakatsiyadır, dep iddia ete.
