Link açıqlığı

Saatnıñ esas haberi

Suleyman Kadırov mahkemede: «Men cinayet işlemedim»


Suleyman Kadırov mahkemede, 2018 senesi mayıs 3 künü
Suleyman Kadırov mahkemede, 2018 senesi mayıs 3 künü

Qırımtatar faaliyetçisi Suleyman Kadırov qabaatlanğan cinayetinde özüni qabaatlı tanımay. Bunı o, mayıs 3-te Qırımnıñ Rusiye mahkemesiniñ oturışuvndaki munaqaşalar esnasında beyan etti, dep bildire Qırım.Aqiqat muhbiri.

Kadırov: «Daa bir kere tekrarlaryım, özümni qabaatlı tanımayım ve areketlerimde Rusiye Cinaiy kodeksiniñ 280.1 maddesi ile tayin etilgen cinayetniñ vaqiası olmağanını sayam. Men cinayet işlemedim, ve bu sebepten mahkemeden maña yımşaqlıq köstermesini istemeyim», – dedi.

O, peşman etmegenini ve kimseden afu soramağanını, ve, ondan ğayrı, soraştıruv organları vekilleriniñ cezalandırılmasında israr etkenini ilâve etti.

Qırımtatar faaliyetçisi: «Mahkemeden sorasam bile, tek bir şey coracam: maña qarşı aqlav ukmü ve menim tarafından husularında artıq tahqiqat organlarına muracaat etilgen ve arizalar berilgen, azırlıq körüv tahqiqatı esnasında yapılğan ve cinayet olaraq cezanlanğan bir sıra areketlerniñ yapıluv vaqiası boyunca hususiy qararlar çıqarılsın.

Mayıs 3-te Rusiyeniñ kontroli altında olğan Qırım Yuqarı mahkemesi qırımtatar faaliyetçisi Suleyman Kadırovğa daa evel Kefe mahkemesi taraından çıqarılğan ukümni deñştirmeyip qaldırdı. Kadırov şartlı olaraq eki yıl apis muddeti ve aynı müddet içinde cemiyet içindeki faaliyetlerniñ yasaq etilmesine mahküm etildi.

Qabaatlavnıñ versiyasına köre, Kadırov 2016 senesi martında, özüni Aqmescitten bir qırımtatar olaraq tanıtqan ve Ukrainanıñ kontroli altında olmağan Donetsk ve Lugansk vilâyetlerini azat etmek içün «Qırım» batalyonınıñ meydanğa ketirilmesi aqqında bildirgen nasıldır Demyan Demyanenkonıñ videoroligini repost etti. Bir qaç aydan soñ repostnıñ altında, içinde, cümleden, «Qol tutam, Qırım evelden de, şimdi de ve kelecekte Ukraina olacaq» sözleri olğan Kadırovnıñ izaatı peyda oldı. Oña qarşı Rusiye Cinaiy kodeksiniñ 280.1 maddesi boyunca iş açıldı. Qabaatlav FSB ekspertleri tarafından yapılğan ve Kadırovnıñ izaatında Rusiyeniñ topraq bütünliginiñ bozulmasına davet olğanını isbatlağan ekspertizağa esaslana.

2017 senesiniñ aprelinde Rusiyeniñ maliy monitoringi boyunca hizmeti Kadırovnı ekstremistler ve terroristler cedveline kirsetti.

Kadırov özü, cinaiy işi – öz noqtai-nazarını faal surette ifade etkenine ve aq-uquqnı qorçalav saasındaki faaliyetlerine cevaben mahsus hizmetler tarafından yapılğan provakatsiyadır, dep iddia ete.

XS
SM
MD
LG