Ukraina Tış işleri nazirliginiñ spikeri Maryana Betsa, Ukrainanıñ Rusiyeden ilhaq etilgen Qırımda ve Donbassnıñ işğal etilgen territoriyasında kütleviy haber vastaları (KHV) serbestligine tazyiqnıñ toqtatılmasını talap etkenini bildirdi. Bunı o, mayıs 2-de özüniñ Twitterinde yazdı.
Bildirüvde: «Bugün #WorldPressFreedomDay2018de işğalci ukümetten işğal etilgen Qırım ve Donbassta KHV serbestligine tazyiqnıñ toqtatılmasını talap etemiz», – denile.
Aprel 10-nda Ukraina jurnalistleri milliy birliginiñ konferents-zalında «Terciman» qırımtatar gazetasınıñ birinci nomerası çıqqanına 135 yıl toluvı ve Qırımtatar jurnalistikası künü munasebeti ile «tögerek masa» keçti. Tedbirde Qırım jurnalistleri, aq-uquq qorçalayıcıları ve Qırımtatar Milliy Meclisiniñ azaları ilhaq etilgen Qırımda söz serbestligi saasındaki vaziyetni, yarımadada vatandaş jurnalistlerine qol tutuv ve qırımtatar kütleviy haber vastalarını inkişav ettirüvni muzakere ettiler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
